Tatum e urren filmin “G.I Joe: Rise of Cobra”

Edhe Channing Tatum është ndër aktorët që janë penduar për ndonjë gjë që kanë bërë gjatë karrierës së tyre, veçanërisht kur mendon për angazhimin që kishte në filmin “G.I Joe: Rise of Cobra”.

Megjithëse filmi ka fituar një shumë të majme parash, 302 milionë dollarë në mbarë botën, 35-vjeçari, ka thënë se e ka pranuar rolin vetëm sa për ta përmbushur obligimin që kishte si pjesë e kontratës me shtëpinë filmike Paramount Pictures, përcjell emisioni Express i KTV-së.

“Do të jem i sinqertë. E urrej atë film. Isha i detyruar ta bëja, kisha kontratë për të realizuar tre filma dhe si i ri më është dukur e mahnitshme ajo që po bëja”, është shprehur Tatum.

Por, përderisa si fëmijë ishte adhurues i filmave të tillë fiktiv, nuk ishte ngazëllyer kur studioja filmike e kishte ftuar për këtë rol. “Skenari nuk ishte aspak i mirë”, ka shtuar aktori.

Megjithatë, ai u shpreh optimist, duke reflektuar se përfshirja në këtë projekt filmik nuk ia ka dëmtuar karrierën. “Mund të kishte qenë… ‘Scream 5’ apo ndonjë i tillë”, ka thënë ai.