Rëndësia e performancës dhe vallëzimit në skenë (Video)

Që vokali është primar për një këngëtar, kjo është më se e qartë. Pavarësisht asaj që po ndodh sot dhe na pëlqeu ose jo, tekefundit ata që i mbijetojnë kohës janë pikërisht këngëtarët e mëdhenj, me vokale të mira e këngë të mirëfillta.

Por që sot krahas zërit janë edhe shumë komponentë të tjerë që ndikojnë në suksesin e një këngëtari apo këngëtareje, edhe këtë nuk mund ta mohojmë. Në fakt, një gjë e tillë është në trend gjithandej, ku një emër muzike, sa më i kompletuar të jetë, aq më mirë do të jenë punët për të dhe sukseset nuk do të mungojnë. Beyonce, Jennifer Lopez, Rihanna, Shakira, Katy Perry e Pink janë vetëm disa nga këngëtaret që të lënë pa fjalë me performancat e tyre, disa me vallëzim, e padyshim të tjera edhe me vokalet e tyre, siç është diva Beyonce.

Nuk ka sesi ky trend të mos ketë përfshirë edhe tregun muzikor shqiptar, edhe pse mund të thuhet lirshëm më shumë se që duhet.

Pra, nga këta komponentë janë edhe performanca e vallëzimi, që kompletojnë një paraqitje në ndonjë skenë, apo në videoklipe. Dhe kësisoj, tashmë është e qartë ndarja mes asaj se cilat janë këngëtare performuese, e cilat ato që veçohen thjesht për vokal.

Derisa jashtë këngëtarët kanë grupet e tyre që përkujdesen për këtë pjesë, në skenën tonë nuk funksionon gjithçka kështu.

Gjithsesi, një nga grupet e vallëzimit te ne që është shumë aktiv tash e 15 vjet dhe pos tjerash ka bashkëpunime të vazhdueshme me këngëtarët tanë është “Future Steps”. Dy nga koreografet e këtij grupi, Sahit Aliu dhe Berat Haskaj, për emisionin “Express” të KTV-së janë shprehur se performanca dhe vallëzimi nuk vlerësohet aq sa duhet nga këngëtarët tanë.

Kur jemi te këngëtaret që veçohen për vallëzimin e tyre te ne, mund të përmendim Genta Ismajlin, Soni Malajn, Dafina Zeqirin e Elvana Gjatën, disa prej të cilave këtë e kanë dëshmuar edhe në garën e vallëzimit, “Dancing With The Stars Albania”.

Ndërkaq, një emër i ri që po ashtu mori komente të mira për këtë pjesë është Kida dhe kjo ndodhi pas klipit “Boni zo”. Në këtë video, këngëtarja e suksesshme tregoi aftësitë e saj në këtë fushë dhe kjo për të është një pjesë shumë e rëndësishme.

Kida pohon për “Express” se në të ardhmen do ta marrë edhe më seriozisht vallëzimin dhe perfomancën, duke e bërë pjesë të videoklipeve e paraqitjeve tjera.

Ajo çfarë është vërejtur këto dy vjetët e fundit te ne është se disa këngëtarë janë duke sjellë një standard të ri, sidomos nëpër mbrëmje muzikore. Nëse më parë thjesht dilnin për të kënduar playback dhe e lëviznin trupin herë me shije, e shpesh krejtësisht jashtë asaj që ndërlidhet me ritmin, sot po ndodh ndryshe. Nëpër mbrëmje muzikore po i shohim me valltarë, duke u munduar që të kënaqin publikun e pranishëm edhe me anë të shout. Këtu bëjnë pjesë Flori Mumajesi dhe Elvana Gjata.

Diçka të ngjashme e ka menduar për të ardhmen edhe këngëtarja e hitit të fundit, “Ama dorën”, Xhensila Myrtezaj.

Kur flasim për atë se a ka shumë këngëtarë që mund të komplimentohen për pjesën e vallëzimit, Sahiti dhe Berati nga “Future Steps” kanë mendime të ndryshme.

Sido që të jetë, dinë apo jo të vallëzojnë, secili me forcat e veta po mundohet ta luajë rolin sa më mirë, ta fitojë publikun për vete me zë e trup, performancë e vallëzim. /Telegrafi/