Katrorë gështenjash

Përbërësit:

Për pendespanjë:
• 6 vezë
• 120 gramë sheqer pluhur
• 50 gramë çokollatë për zierje
• 2 lugë miell
• 1 pluhur për pjekje
• 150 gramë pure gështenjash

Për krem:
• 120 gramë gjalpë
• 120 gramë sheqer pluhur
• 350 gramë pure gështenjash
• 100 gramë çokollatë qumështi
• 100 gramë lajthi të bluara
• 2 lugë rum

Për glazurë:
• 100 gramë çokollatë për zierje
• 100 gramë gjalpë

Gatimi:

Pendespanja:
1. Të bardhtë e vezëve ndahen nga të verdhtë. Të bardhtë tunden derisa të fitohet një shkumë e trashë.

2. Në një enë të madhe tunden të verdhtë e vezëve, sheqeri pluhur, pureja e gështenjave, çokollata për zierje e grirë në rende, mielli dhe pluhuri për pjekje. Të gjitha përzihen mirë.

3. Shtohet shkuma nga të bardhtë e vezëve dhe përzihet ngadalë. Në tavën drejtkëndëshe shtrohet letër për pjekje, derdhet në të masa e përgatitur dhe piqet, derisa të skuqet, në furrën e nxehtë në 200 gradë Celsius.

Kremi:
Në enë të përshtatshme bashkohen gjalpi, sheqeri pluhur, çokollata e shkrirë e qumështit, pureja e gështenjave, lajthitë e bluara dhe rumi. Të gjitha përzihen mirë.

Glazura nga çokollata:
Në temperaturë mesatare shkrihet çokollata dhe gjalpi, në mënyrë që të fitohet masë kompakte.

Finalizimi:
Pendespanja lyhet me kremin e përgatitur dhe përmbi i derdhet glazurë çokollate.

Këshillë shtesë: Në vend të glazurës nga çokollata, ëmbëlsira mund të lyhet edhe me krem pana. /Telegrafi/