Qasja e re mund të çojë në vaksinat e inhalueshme për gripin dhe pneumoninë

Studiuesit në Chapel Hill dhe Universitetin Shtetëror të Karolinës së Veriut e kanë zbuluar një qasje të re për krijimin e vaksinave të inhalueshme, duke i përdorur nanogrimcat, qasje kjo që premton në shënjestrimin e sëmundjeve të lidhura me mushkëritë, si gripi, pneumonia dhe tuberkulozi.

Puna, e udhëhequr nga Cathy Fromen dhe Gregory Robbins, anëtarë të laboratorëve DeSimone & Ting, zbulon se ngarkesa e sipërfaqes së grimcës e luan një rol kyç në shkaktimin e reagimeve imune në mushkëri.

Duke e përdorur teknologjinë Particle Replication in Nonwetting Templates (pRIN1), të shpikur në laboratorin DeSimone, Fromen dhe Robbins ishin në gjendje ta modifikojnë në mënyrë specifike ngarkesën e sipërfaqes së grimca ve të mbushura me proteina duke e shmangur përçarjen e karakteristikave të tjera të grimcës, duke e demonstruar kështu aftësinë unike të PRINT-it për t’i modifikuar atributet e grimcës në mënyrë të pavarur nga njëra-tjetra.

Kur jepeshin përmes mushkërive, grimcat me një ngarkesë pozitive të sipërfaqes treguan se nxisin reagime të antitrupave si lokalisht në mushkëri ashtu edhe sistemikisht në trup. Në kontrast, grimcat me ngarkesë negative të së njëjtës përbërje çuan në reagime më të dobëta, dhe në disa raste të padetektueshme imunitare, duke sugjeruar se ngarkesa e grimcës është një veçori e rëndësishme për vaksinimin pulmonar.

Gjetjet, e botuara në Proceedings of the National Academy of Sciences, gjithashtu kanë implikime të gjera të shëndetit publik për përmirësimin e qasjes në vaksina.

Një vaksinë e inhalueshme mund ta eliminojë nevojën për ftohje, gjë që nuk e përmirëson vetëm afatin e magazinimit, por edhe e mundëson shpërndarjen e vaksinave në zonat me burime të ulëta, duke përfshirë shumë vende në zhvillim ku ka nevojë të madhe për qasje më të mirë në vaksina. /Telegrafi/