Pilingu natyror, melhem për lëkurën e yndyrshme

Bëjeni vetë pilingun në shtëpi. Një gjë e tillë është më e lirë, më e sigurt dhe i bën shumë mirë lëkurës së yndyrshme.

Ekzistojnë dy mënyra të pilingut natyror, të cilat janë shumë të përshtatshme për lëkurën e yndyrshme. Pilingu i llojit të parë është ai abraziv i butë, që bëhet me sodë bikarboni dhe tërshërë, masë e cila kur të fërkohet në lëkurë, heq qelizat e vdekura.

Lloj tjetër janë pilingjet kimike, të cilat përgatiten nga disa lloje pemësh. Ato përmbajnë enzime dhe thartira alfahidroksile, të cilat zbërthejnë yndyrën e lëkurës dhe, me këtë, mundësojnë përtëritjen e qelizave të lëkurës, duke hequr në të njëjtën kohë
qelizat e vdekura nga sipërfaqja e lëkurës.

Ja disa ushqime, të cilat mund të përdorni për piling:
Le të fillojmë nga të bardhët e vezës. Për të ekspertët thonë se pastron puçrrat e zeza. Ja si vepron: Ndajeni të bardhën nga e kuqja e vezës, pastaj tundeni dhe formoni shkumë. Kësaj mase shtojani dy lugë miell misri dhe këtë masë vendoseni në fytyrën e pastruar. Lëreni që të veprojë gjysmë ore, e më pas shpëlajeni me ujë të vakët.

Ky piling është shumë efikas kundër puçrrave të zeza, por po ashtu parandalon rrudhat.
Edhe maska me ananas mund të përdoret në mënyrë të ngjashme dhe jep efekte të njëjta. /Telegrafi/