Gjilani, një pasuri e çmuar e trashëgimisë kulturore

Zëvendësministri i Kulturës, Rinisë dhe Sportit, Rexhep Hoti, ka qëndruar sot për një vizitë në Gjilan, ku është takuar me kryetarin e kësaj komune, Lutfi Haziri, si dhe ka vizituar disa objekte të trashëgimisë kulturore.

Hoti dhe Haziri kanë bashkëbiseduar për jetën dhe organizimin kulturor në këtë komunë, sikundër që kanë folur edhe për investimet e MKRS-së, mbrojtjen dhe restaurimin e objekteve të trashëgimisë kulturore dhe promovimin e tyre.

Hoti tha se Gjilani së bashku me Prizrenin kanë një qytetari dhe kulturë të veçantë që kulmon me shumë vlera të trashëgimisë kulturore e historike të gërshetuara në diversitetin kulturor.

Kurse, i pari i Gjilanit, ka treguar disa nga problemet kulturore të komunës që e udhëheq duke kërkuar ndihmë nga MKRS-ja.

Hoti, së bashku me kryetarin Haziri, pas takimit vizituan objektet e trashëgimisë kulturore në Gjilan, të cilat janë nën përkujdesjen e MKRS-së, siç është Muzeu i Qytetit dhe Shkolla e Muzikës.

Ata vizituan edhe Atik Xhaminë, ku Haziri deklaroi se gjatë vitit të ardhshëm është propozuar që të bëhet renovimi dhe mirëmbajtja e saj, sepse xhami e këtillë ndodhet vetëm në Ohër, që si ndërtim korrespondon me vlera fetare dhe kombëtare. /Telegrafi/