Hoti u prit në Bundestag nga Kreu i Komisionit për Kulturë

Zëvendësministri i Kulturës, Rexhep Hoti, ka zhvilluar takim me deputetë të Bundestagut gjerman, ku është pritur nga Siegmund Ehrmann (SPD), Kryetar i Komisionit për Kulturë dhe Media.

Siegmund Ehrmann (SPD), Kryetar i Komisionit për Kulturë dhe Media ishte i shoqëruar nga Dr. HerlindGundelach (CDU), nënkryetare e komisionit dhe JohannesSelle (CDU), anëtar.

Në këtë takim tepër të rëndësishëm dhe me interes për Kosovën, u diskutua për çështje që kanë të bëjnë mbi marrëdhëniet mes të dy vendeve, Kosovës e Gjermanisë. Vend të veçantë zuri diskutimi për kulturën, bashkëpunimin dhe shkëmbimin e përvojave në projekte konkrete. Përkitazi për çështjet në fjalë, tashmë kur ekziston marrëveshja kulturore e nënshkruar mes dy vendeve në vitin 2012, u bisedua për avancimin e bashkëveprimit në fushat e kulturës.

Kryetari i Komisionit për Kulturë dhe Media në Bundestagun gjerman, Ehrmann, e informoi zëvendësministrin Hoti për punën dhe kompetencat që ka komisioni të cilin ai e drejton, ku përfshihen aspekti legjislativ për kulturë dhe media, ai i buxhetit për këto dy fusha si dhe bashkëpunimet kulturore.

Deputetët gjermanë u shprehën se janë të interesuar për të dëgjuar për jetën dhe organizimin kulturor në Kosovë dhe për punën që bën Qeveria e Kosovës, konkretisht MKRS në përmbushjen e kërkesave të komunitetit kulturor. Në kuadër të tërë kësaj, drejtuesit e Komisionit për Kulturë dhe Media të Bundestagut shprehën gatishmërinë e plotë për të ndihmuar aty ku pala kosovare e sheh të nevojshme dhe të arsyeshme, madje duke iu drejtuar zëvendësministrit Hoti me fjalët “Çfarë mund të bëjmë ne për ju?”.

Nga ana e tij, zëvendësministri Hoti, i falënderoi deputetët gjerman për pritjen e ngrohtë. Ai tha se Qeveria dhe populli i Kosovës i janë mirënjohës dhe falënderues shtetit e tërë popullit gjerman për ndihmën dhe mbështetjen e pakursyer që kanë dhënë për Kosovën në të gjitha fushat, e veçanërisht për ato që mbulon MKRS-ja.

Hoti e njoftoi kryetarin Ehrmann dhe bashkëpunëtorët e tij për punën, arritjet dhe prioritetet që bën dhe ka MKRS-ja në lidhje me fushat konkrete të kulturës siç janë diversiteti kulturor, diplomacia e promovimi kulturor si dhe trashëgimia kulturore. Hoti tha se bashkëpunimi mes dy vendeve mund të ndodh nëpërmjet instituteve,shkëmbimit të ekspertëve në këto pika, organizmin e aktiviteteve edukative kulturore, si trajnime, punëtori e seminare, aktiviteteve kulturore, duke krijuar kësisoj ngritjen e kuadrove por edhe të mundësive të reja.

“Në aspektin e bashkëpunimit mes të dyja shteteve, e nevojshme është që të ketë shkëmbim përvojash edhe në promovimin e diversitetit dhe dialogut kulturor i cili është mjet për t’i sjellë njerëzit e komuniteteve të ndryshme më afër”, tha Hoti.

Zëvendësministri i informoi deputetët gjerman se Kosova konkretisht ka pasur bashkëpunim me Gjermaninë, në fushën e trashëgimisë kulturore, dhe në fushat tjera, ku organizata të ndryshme gjermane kanë bashkëpunuar dhe kanë qenë aktive në Kosovë.

Po ashtu, Hoti tha se Kosova është përcaktuar për perspektivën evropiane dhe është e orientuar për integrim evropian, dhe në liberalizimin e vizave. Ai vuri theksin në faktin se Qeveria e Kosovës, e në veçanti MKRS-ja në prioritetet e saj ka anëtarësimin në institucionet ndërkombëtare kulturore, ku përmendi dhe kërkoi angazhimin e tyre në kuadër të procesit të anëtarësimit të Kosovës në UNESCO.