Berisha: Do të japim maksimumin ndaj Astanas për fitore

Sigal Prishtina kërkon që t’iu kthehet fitoreve në garën e FIBA Evrope Cup. Ekipi ‘bardhekaltër’ do të luajë kundër skuadrës së Astana-n nga Kazakistani.

Basketbollisti më i mirë kosovar, Dardan Berisha ka thënë se do të japin maksimumin ndaj Astanas për të arritur fitore.

“Ekipi nga Kazakistani në fakt është favorit për ta fituar grupin, ndërsa është ndër favoritët për ta fituar gjithë garën e FIBA Europe Cup. Pra bëhet fjalë për një kundërshtarë shumë të fortë, por pavarësisht kësaj ne do të hyjmë në parket për të dëshmuar lojë sa më të mirë. Kemi mjaft informata për kundërshtarin tonë të radhës, andaj edhe pas kthimit nga Rumania jemi përgatitur maksimalisht për lojën kundër tyre”.

“E rëndësishme se jemi rikuperuar pas humbjes nga Energia dhe pas gjithë asaj lodhjeje që e kemi përjetuar gjatë dhe pas kthimit nga qyteti rumun. Por kjo i takuan të kaluarës dhe ne tani jemi të përqendruar për duelin me Astana-n”, ka shtuar Berisha.

11-shja e bardhekaltërve gjithashtu mendon se loja e dëshmuar ndaj Energia-s në Rumani nuk është fytyra e vërtetë e Prishtinës, pasi sipas tij klubi kryeqytetas në vazhdim të edicionit në FIBA Europe Cup do të tregoj lojëra gjithnjë e më të mira: “Do të fillojmë ta bëjmë këtë që nga ndeshja me Astana-n. Kundër Energia-s ka qenë vetëm një ditë e keqe për ne. E filluam takimin në mënyrë të keqe, në anën tjetër kundërshtari e nisi mirë dhe kjo bëri që në fund të pësojmë disfatë. Nuk jemi zhgënjyer, sepse ne besojmë në forcën tonë dhe e dimë se mund të bëjmë çdo herë e më mirë”, është shprehur Berisha.

Ai pret që të mërkurën mbrëma palestra të jetë e stërmbushur në përkrahje të kampionëve të Kosovës dhe të Ligës Ballkanike (BIBL).

“Ne shpresojmë shumë që adhuruesit e basketbollit atë natë do të jenë të pranishëm në numër sa më të madh në palestër, sepse ne kemi nevojë për mbështetje sa më të madhe. Në anën tjetër ne premtojmë se do t’i kënaqim me lojë të mirë dhe basketboll cilësor”, ka përfunduar Berisha për faqen zyrtare të Federatës së Basketbollit të Kosovës. /Telegrafi/