HTC është prodhuesi i Facebook Phone?

Për një kohë të gjatë flitej se rrjeti social, Facebook.com po angazhohej për të prodhuar telefonin e vet origjinal, të cilin do ta quante – Facebook Phone.

Mirëpo, më pas ajo që bëri Facebook ishte vetëm paralajmërimi i aplikacioneve të freskuara për sistemet më të famshme operative të cilat sot përdoren në telefonat e mençur mobil.

Si duket, thashethemet për telefonin e Facebook kanë filluar përsëri, dhe kësaj radhe thuhet se HTC do të jetë prodhuesi i Facebook Phone.

Për më shumë, thuhet se prodhuesi më i famshëm i telefonave të mençur që bazohen në Android, kompania HTC, do të lansojë Facebook Phone gjatë Kongresit Botëror Mobil që mbahet në Barcelonë gjatë fillimit të muajit shkurt 2011.

Pritet që telefoni i mençur i Facebook do të paraqitet në treg me ngjyrat dhe simbolet tjera që e karakterizojnë këtë rrjet social, ndërsa gjithashtu pritet që ky telefon të bazohet në një version të personalizuar të sistemit operativ Android, i cili do të ofrojë integrim të plotë me rrjetin social dhe shërbimet kryesore që i njëjti i ofron për më shumë se 550 milionë përdorues në mbarë botën.

Megjithatë, kjo mbetet vetëm një thashetheme e momentit, sepse ende nuk dihet nëse në planet e HTC’së ekziston një telefon i mençur i quajtur Facebook Phone, ndërsa edhe drejtori i Facebook, Mark Zuckerberg e pati mohuar se kanë plane të bëjnë diçka të tillë. / Telegrafi /