Prishtina aranzhon miqësore kundër Sivassporit

Prishtina do të ketë agjendë të ngjeshur në javët e ardhshme. Klubi më i madh në vend pritet të luajë katër ndeshje miqësore ndërkombëtare. Më e madhja pritet të jetë ajo me turqit e Superligës së Turqisë, Sivasspor. Pas bashkëpunimit që lidhën këto skuadra muaj më parë, miqësorja e parë pritet të ndodh muajin e ardhshëm.

“Në fillim të muajit shtator do të luajmë ndaj Sivassporit në Prishtinë. Për detajet tjera dhe datën opinioni do të njoftohet me kohë. Me Sivassporin do të luajmë edhe ndeshjen kthyese”, deklaroi drejtori i Prishtinës, Sokol Krasniqi për Arenën. Ai bëri me dije se shtabi teknik me në krye Bylbyl Sokolin po negocion me klube shqiptare të Shqipërisë e Maqedonisë, për miqësore tjera. “Trajneri ynë dhe Bordi i klubit po bisedojnë me Kukësin, Shkëndijën e Renovën, për të luajtur miqësore me ta”, shtoi Krasniqi për gazetën.

Në anën tjetër, Sokoli konfirmon se miqësoret në fjalë do të luhen dhe do të jenë ardhje-vajtje. Ai më parë ka drejtuar dy skuadrat nga Maqedonia, Renova e Shkëndija, kurse me Kukësin ishte këtë verë në bisedime. “Ende nuk i kemi caktuar datat, por ndeshjen do të luhen së pari në Prishtinë e më pas në Kukës dhe Tetovë”, bëri me dije Sokoli. /Telegrafi/