Pse u kacafytën Liridon Kukaj dhe Haxhi Zeka?

Ishin lojtarët më të vjetër në skuadrat e tyre, por nuk arritën t’i mbajnë nervat nën kontroll. Liridon Kukaj i Prishtinës dhe Haxhi Zeka i Besës së Pejës vazhduan edhe të shtunën duelin fizik. Gjithçka filloi një vit më parë në Pejë, kur lojtarët kishin fërkime njëri me tjetrin, dhe Kukaj nuk ia harroi për t’ia kthyer të shtunën në Prishtinë. Liridoni akuzon sulmuesin pejan për provokime, ndërsa Zeka tregon arsyet se si ka ardhur deri tek kjo përleshje. Që të dy u ndëshkuan me karton të kuq nga gjyqtari Selim Isufi.

“U ngutem pak na dy pleqtë e Superligës. Kjo ka të bëjë pak edhe me ndeshjen e kaluar ku ka qenë ai inati, pasi nuk më ka pritur fare mirë, por nuk kam hyrë në këtë ndeshje me qëllim që t’i hakmerrem. Ai pisi ma vuri dorën në qafë dhe më ka grithur, për këtë arsye u desh që të reagoj edhe unë”, deklaroi Kukaj për Arenën. Tutje, mbrojtësi i Prishtinës, tha se është pishman që ra në provokimet e Haxhi Zekës, por nuk pendohet që reagoi në mënyrë të tillë.

“Sinqerisht po them që jam shumë pishman që kam rënë në nivel të atij pisi plak, por nuk pendohem për gjestin që kam bërë pasi i pari ka qenë ai që më ka provokuar dhe nervat më tradhtuan”, vazhdoi Kukaj. Ish-mbrojtësi i Trepçës `89, shpreson që çdo gjë ka mbetur në fushë dhe më mos të bëjë ndonjë gjest të tillë. /Arena/Telegrafi/