Presin ndihmë nga komuna

Viti i ri është afër, ndaj Ferizaj e Drita po presin shefat e ri të qytetit për ‘dhuratat’ e fundvitit. Që të dy klubet janë në pritje të kryetarëve të rinj komunal, për marrjen e ‘dritës së gjelbër’ rreth ndihmës financiare për stinorin pranveror. Muharrem Sfarqa (Ferizaj) e Lutfi Haziri (Gjilan) gjatë ditëve të ardhshme do të takohen me krerët e këtyre klubeve, pasi që prej të hënës janë ulur në kolltukun e kryetarit.

Drejtori i ekipit ferizajas, Nadir Haxhimusa, konfirmoi që kryesia e klubit është në pritje të kryetarit Sfarqa. “Kryetari i komunës sonë ka qenë shumë i nxënë gjatë ditëve të fundit. Jemi ende duke e pritur atë, për të mbajtur një takim që mund të jetë vendimtar për të ardhmen e klubit. Besoj që kjo mbledhje do të mbahet gjatë ditëve të ardhshme”, deklaroi Haxhimusa.
Në pritje të këtij takimi, klubi ferizajas ka siguruar ndihmën financiare të tre sponsorëve të fuqishëm. Bëhet fjalë për kompanitë ‘Bardhi’, ‘Eskavatori’ dhe ‘X Project’.

“Kemi biseduar vazhdimisht gjatë ditëve të fundit dhe tani kemi konfirmimin e tre sponsorëve të fuqishëm, të cilët do të na ndihmojnë në stinorin pranveror. ‘Bardhi’, ‘Eskavatori’ dhe ‘X Project’ do të derdhin mjete financiare në arkat e klubit, në mënyrë që t’i arrijmë objektivat që i kemi”, shtoi Haxhimusa. Të kujtojmë që as trajneri Bylbyl Sokoli e futbollistët tjerë të skuadrës, nuk e kanë të sigurt qëndrimin te ‘bardhekaltërit’. /Tribuna/Telegrafi/