Partizani e Shkëndija pas Zhdrellës

Sikurse në të kaluarën, edhe tani shumë skuadra iu kanë vënë pas Mentor Zhdrellës, me të cilin duan të përforcohen qysh në afatin kalimtar të janarit. Përveç skuadrave kosovare, futbollisti i njohur po kërkohet edhe nga klubet e Shqipërisë dhe ato të Maqedonisë. Madje, dy prej tyre tashmë i kanë nis seriozisht përpjekjet për t’i siguruar shërbimet e kapitenit të Hysit.

Fjala është për Partizanin e Tiranës dhe Shkëndijën e Tetovës. Këto dy klube i kanë nisur bisedimet me Hysin dhe vet futbollistin, për shërbimet e të cilit kanë nevojë të madhe. Lajmin e ka konfirmuar edhe vetë futbollisti më i mirë i shpallur tri herë në Kosovë. “Presidenti i Partizanit ka ardhur në Kosovë ku ka folur me kryetarin e Hysit, Hysen Sadiku. Partizani më ka kërkuar në formë huazimi”, deklaroi për Arenën Zhdrella.

“Ndërsa, edhe zyrtarët e Shkëndijës kanë ardhur në Kosovë, me të cilët jam takuar dhe kemi biseduar”, shtoi Zhdrella. Ai nuk e përjashtoi mundësinë që t’i bashkohet ndonjërës prej këtyre dy skuadrave, nëse pajtohet klubi i tij aktual, Hysi, me të cilin Zhdrella ka kontratë.

“Varët nga klubi a më liron apo jo. Unë ua kam bërë me dije se nuk lëvizi pa pëlqimin e Hysit. Kam kontratë me Hysin dhe dua ta respektoj, andaj mund të lëvizi vetëm nëse pajtohet Hysi”, përfundoi Zhdrella, i cili qe shumë vite kërkohet nga shumë skuadra kosovare e të huaja, por assesi nuk lëvizur nga Merdara. /Tribuna/Telegrafi/