Sezoni i ri i basketbollit fillon me 5 tetor, Superliga me 8 ekipe

Federata e Basketbollit të Kosovës (FBK) ka vendosur që sezoni i ri i ETC Superligës të fillojë më 5 tetor. Ky vendim është mbajtur pas mbledhjes së Bordit të FBK-së, të mbajtur të enjten. Ndërkohë, shtëpia e basketbollit kosovar ka njoftuar se shorti për edicionin e ri do të hidhet të premten (nesër) nga ora 12:00, në zyrat e FBK-së.

Ndërkohë, Bordi konstatoi edhe një herë se KB Vëllaznimi, duke mos qenë në gjendje t’i përmbushë obligimet ndaj FBK-së dhe duke mos pasur palestër në dispozicion dhe mungesë të kushteve për garim korrekt në Superligë, tërhiqet nga garimi në Superligë, dhe kjo e fundit në sezonin 2013/14 do t’i ketë 8 ekipe: Peja, Sigal Prishtina, Bashkimi, RTV21, Trepça, Drita, Besa e Kastrioti.

Bordi miratoi propozimin që turneu final i Kupës së Kosovës të organizohet në fundjavën para fillimit të ciklit të fundit të sezonit të rregullt (xhiroja e 22-të).

Po ashtu, u mor vendimi që afati i fundit për ndërrim të lojtarëve në ekipe të jetë 72 orë para fillimit të ciklit të fundit të sezonit të rregullt (xhiroja 22).

Bordi miratoi propozim – ndryshimet e Propozicioneve të Garave për sezonin 2013/14, përfshi ndryshimin e modelit të topave (Superliga dhe Liga e Parë e meshkujve do t’i zhvillojnë ndeshjet me topa të markës Spalding tipi TF – 1000).

Bordi i FBK-së miratoi marrëveshjen për partneritet me kompaninë IPKO, ndërsa u emërua edhe Këshilli Profesional në përbërje: Bekim Maxhuni – kryetar, Shkëlzen Fetiu, Arben Polloshka, Arianit Shala dhe Elvira Dushku – anëtarë.

Nëprill të vitit 2014 në Suharekë do të organizohet ALL STAR ndeshja, memoriali Isuf Lumi, për nder të ish kryetarit dhe sekretarit të përgjithshëm të FBK-së, Isuf Lumi. /Express/Telegrafi/