Besa e Drenica marrin nga tre pikë

Në kuadër të javës së shtatë të Raiffeisen Superligës së Kosovës në futboll, Besa e ka mposhtur Fushë Kosovën me rezultat minimal, 1-0, kurse Drenica shënoi fitore të merituar ndaj Ferizajt, me rezultat 3-1.

Besa – Fushë Kosova 1:0

Besa ka shënuar fitore të merituar, por të mundimshme ndaj Fushë Kosovës. Veterani Haxhi Zeka ka qenë hero i skuadrës pejane, falë golit të shënuar në minutën e 20-të nga gjuajtja e lirë. Mirëpo, kapiteni i ekipit bardhe kuq e ka humbur penalltinë në fund të pjesës së parë.

Në pjesën e dytë, Fushë Kosova ka rrezikuar seriozisht me Shkëlzen Jashanicën, që e qëlloi shtyllën. Edhe pejanët i kishin rastet e tyre të mira, por nuk ditën t’i shfrytëzonin.

Drenica – Ferizaj 3:1

Drenica e ka shijuar fitoren e dytë të sezonit, duke e mposhtur Ferizajn. Skuadra vendëse ka qenë më e mirë dhe ka fituar me meritë. Besim Bajraktari i kaloi kuqezinjtë në epërsi qysh në minutën e 25-të, ndërsa Hysni Tahiri e shtoi avantazhin në minutën e 52-të.

Ajo që mundën të bënin djelmoshat e Bylbyl Sokolit ishte ta ngushtonin rezultatin në minutën e 60-të përmes Qëndrim Dautajt, por Genc Hamiti qartësoi gjithçka sa ipërket fituesit, pas golit të realizuar në minutën e 67-të. Kjo fitore i shërben shumë Drenicës, e cila i ikën sadopak fundit të tabelës. /Express/Telegrafi/