Gjithçka gati për super-sfidat Sigal Prishtina – Besiktas

Gjithçka është gati për zhvillimin e ndeshjeve miqësore ndërmjet Sigal Prishtinës dhe Besiktasit. Gjiganti turk ka zbarkuar në Kosovë dhe do ta nderojë nënkampionin kosovar me dy ndeshje revyale, të cilat do të zhvillohen sonte dhe nesër mbrëma.

Pallati i Rinisë dhe Sporteve do të jetë arenë e kësaj ndeshjeje spektakolare, që do të zhvillohet sonte duke filluar nga ora 20:00. Të mos harrojmë se Plisat janë organizuar që në këtë ndeshje të marrin pjesë masovikisht dhe të dhurojnë një atmosferë të jashtëzakonshme për këtë ndeshje.

Ndërkaq, përballja e dytë do të zhvillohet nesër mbrëma në palestrën sportive ‘Sezai Surroi’ në Prizren, duke filluar nga ora 19:00.

Trajneri turk Ahmet Kandemir, i cili e udhëhoqi ekipin kryeqytetas për dy muaj, duke ia sjell Kupën e Kosovës, ishte ndërmjetësues i këtyre ballafaqimeve.

Siç dihet, trajneri i njohur turk gjatë kësaj vere nënshkroi kontratë trevjeçare me gjigantin nga Stambolli. Pa dyshim, Besiktasi është njëri prej klubeve më të mëdhenj që zbarkon në Kosovë. /Express/Telegrafi/