Tovërlani thyen heshtjen

Afrim Tovërlani, për momentin, pa saktësuar afatin, ka vendosur të mos deklarohet për mediume, por vetëm për ueb-faqen e klubit dhe njëherësh iu apelon ‘Plisave’ që në numër sa më të madh të mbështesin skuadrën e zemrës në derbin me Trepçën '89.

Është quar shumë pluhur kohën e fundit rreth deklaratave për shtyp të kryetrajnerit dhe shefit të shtabit teknik të Prishtinës, Afrim Tovërlani. Megjithatë, ai thyen heshtjen, por vetëm për ueb-faqen tonë të klubit. Tovërlani tregon arsyet se përse ka vendosur të heshtë, por ka folur edhe rreth ndeshjes së humbur me Feronikelin, ndeshjes derbi të ditës së sotme me Trepçën ’89 dhe “çështjes” Idrizi.

Ju sjellim intervistën e shkurtër dhe të plotë, e cila me qëllim është vendosur të mos publikohet më herët që kjo mos mund të riprodhohet nga mediumet tjera, gjë të cilën kategorikisht nuk e dëshiron Tovërlani.

Prishtinafc.com: Keni vendosur të mos prononcoheni më për shtyp. Përse? Dhe, sa do të zgjasë kjo ‘heshtje’ juaj?

Tovërlani: Unë prononcohem vetëm atëherë kur dua unë dhe jo kur duan të tjerët dhe nuk do të lejoj më të shiten gazetat me emrin tim. Ka të ashtuquajtur gazetarë që e shfrytëzojnë emrin tim dhe klubin e Prishtinës që t’i mbushin faqet e tyre të gazetave e që pastaj t’i shesin ato, por tash e tutje nuk do ta kenë atë mundësi.

Tjetra, nëse një deklaratë e imja që nuk ka përmbajtur asgjë ofenduese dhe ka pasur gazeta që kanë prejudikuar që ka pasur pjesë ofenduese, dhe që gjithashtu këto gazeta kanë prejudikuar që të dënohem nga komisioni disiplinor i Federatës dhe për këtë tash e tutje është problem i imi se kur do të prononcohem dhe si do të prononcohem.

Tjetra, Prishtina është klub privat dhe nuk i kemi borxh t’i prononcohemi askujt, por çdo anëtarë i joni do të prononcohet, si duam dhe kur duam ne. Ne mund edhe të rrejmë, por ky është klub privat dhe nuk mbajmë përgjegjësi. Ne nuk jemi medium që të mbajmë përgjegjësi për fjalën që e themi. Pra, do të prononcohem vetëm kur dua unë dhe jo kur t’ju teket të tjerëve.

Prishtinafc.com: Opinioni juaj rreth ndeshjes së humbur në Skenderaj me Feronikelin?

Tovërlani: Ndeshja me Feronikelin është e harruar, e kaluar, është njëra prej ndeshjeve më të dobëta prej kur unë udhëheq Prishtinën. Kemi pasur shumë mungesa, lëndime edhe futbollist të sëmurë, por nuk po dua të arsyetohem. Ata futbollistë të Prishtinës që e bartin fanellën e Prishtinës, nuk iu ka hije të sillën në atë mënyrë dhe që mos të kenë më shumë angazhim se që kanë pasur në ndeshjen me Feronikelin. Prapë po them, kjo ndeshje është e kaluar dhe është harruar si nga unë, nga shtabi teknik dhe futbollistët.

Prishtinafc.com: Ndeshja e sotme me Trepçën ’89?

Tovërlani: Kjo ndeshje për ne është shumë me rëndësi, ndërsa për Trepçën ’89 është një derbi shumë i madh dhe jetik. Kanë ekip të mirë me disa individ të mirë, por të gjitha do të përfundojnë me fillim e ndeshjes. E dinë ata mirë se çka i pret në fushën e Prishtinës dhe jam i bindur që në asnjë mënyrë nuk do t’ju plotësohen dëshirat e tyre, por do t’i mposhtim dhe jam më se i bindur se me rezultat të mirë, edhe pse nuk mund të them shumë të thellë, por me rezultat të mirë.

Shfrytëzoj rastin t’i ftoj në numër sa më të madh ‘Plisat’, por edhe qytetarët e Prishtinës, sidomos ata të cilët nëpër kafene e kanë plot gojën Prishtinë, por shpesh herë nëpër ndeshje nuk i shohim. Pra, është rasti që të vijnë dhe t’i përkrahin futbollistët e klubit të zemrës së tyre.

Prishtinafc.com: Ekziston më, apo s’ka ekzistuar asnjëherë “çështja Idrizi”?

Tovërlani: Nuk ka çështje Idrizi. Edhe ato kanë qenë më tepër thashetheme. Sepse, Idrizi nuk ka ardhur në kryevete në Prishtinë, por shumica e anëtarëve të Bordit e kanë dhënë ‘pro’-në dhe për atë shkak ka ardhur në Prishtinë. Idrizi nuk ka ardhur tek ne se është ndonjë bukurosh, por për shkak cilësive që posedon si futbollist dhe për shkak se i duhet Prishtinës pas shumë largimeve gjatë kësaj vere. /Prishtinafc/Telegrafi/