‘Përplasen’ të mëdhenjtë

Xhiroja e tretë e Superligës së Kosovës në futboll do ta sjellë super-derbin kosovar, respektivisht ‘përplasjen’ mes dy kandidatëve kryesorë për titull të kampionit. Fjala është për takimin ndërmjet Prishtinës dhe Trepçës ’89, i cili do të zhvillohet të dielën në kryeqytet.

Kampioni në fuqi në këtë ndeshje do të hyj pas humbjes shokuese që e pësoi në javën e shkuar në Skenderaj nga Ferronikeli me rezultat 2:0. Por, ekipi i Afrim Tovërlanit tashmë e ka harruar atë disfatë, derisa është përqendruar maksimalisht në derbin ndaj nënkampionit. Bardhekaltërit besojnë se pikërisht ndaj rivalit të tyre do t’u rikthehen fitoreve.

“Pas humbjes nga Ferronikeli kemi punuar shumë për t’u këndell. Ndeshja ndaj Trepçës ’89 është shumë e rëndësishme për ne. Jemi përqendruar maksimalisht në këtë duel, të cilin synojmë ta fitojmë, me qëllim që të këndellemi për garat e mëtutjeshme”, tha për Arenën, ndihmësi kryesor i Afrim Tovërlanit, Ali osmani.

Ai tregoi se për këtë derbi Tovërlanit do t’i kthehen t’i ketë në dispozicion të gjithë futbollistët, edhe ata që i munguan në Skenderaj. /Tribuna/Telegrafi/