Sejdiu: 89-shi do të jetë edhe më i fortë

Barazimi në shtëpi me Llamkos Kosovën (0:0) nuk e ka shqetësuar fare Trepçën ’89. Kandidati kryesor për titull vazhdon të besojë se ka fuqi për ta fituar titullin e kampionit në fund të këtij edicioni. Kështu thotë trajneri mitrovicas, Gani Sejdiu.

“Ai barazim ishte diçka normale, sepse në fund të fundit përballë kishim një ekip shumë të fort. Ky është veç fillimi. Unë kam besim te vetja ime por edhe te djelmoshat e mi. Ju garantoj, se nëse rastësisht filloj ta humbi besimin, largohem. Unë jam trajner dhe besoj, e assesi nuk dorëzohem lehtë”, tha për Arenën Sejdiu, ekipin e të cilit në fundjavën e ardhshme e pret një udhëtim i vështirë, pasi në kryeqytet do ta sfidojë kampioni në fuqi, Prishtina.

“Ne do të shkojmë duke u përmirësuar. Në Prishtinë shkojmë me disa mungesa, por megjithatë, atje synojmë një rezultat pozitiv. Përveç fitores, edhe barazimi do të na konvenonte në këtë fillim të kampionatit. Me optimizëm e pres këtë derbi”, theksoi trajneri i njohur në Kosovë. Pas dy xhirove, Trepça ’89 është e para në tabelë me katër pikë. /Tribuna/Telegrafi/