Belegu flet për bisedimet e sportit me Serbinë

Kryetari ri i Federatës së Basketbollit të Kosovës, Erolld Belegu, ka thënë se është mirë që të flitet për sportin në bisedimet me Serbinë.

“Është mirë që sporti do të futet në bisedimet në mes të të dyja palëve. Kërkesa e jonë duhet të jetë konkrete dhe mos të lëshojmë pe, sikur në sferat tjera. Karta olimpike është e qartë: sporti është për paqe, afrim të popujve dhe njerëzve dhe nuk shoh asnjë arsye që Serbia të qojë pluhur dhe zhurmë dhe të na pengojë”, deklaroi kryetari i ri i Federatës së Basketbollit të Kosovës (FBK), Erolld Belegu.

Për dallim prej disa Federatave ndërkombëtare, të cilat e kushtëzojnë pranimin e Federatave të reja me të qenit pjesë e atij shteti në OKB, e që Kosova në këtë rast nuk është, shtëpia e basketbollit kosovar do ta ketë më lehtë. Këtë e shpjegon më mirë kreu i ri i FBK-së.

“FIBA i ka rregullat më të lehta pasi thotë se një shtet duhet të jetë i pranuar ndërkombëtarisht, për t’u bërë pjesë e saj. Pastaj, ekziston edhe një mundësi, që ceket në nenin 7,3 të FIBA-s, që shteti i cili vjen nga regjioni e që është duke u pranuar, që është në proces (Kosova), mund të bëhet pjesë e FIBA-s nëse Federata amë (që e konsiderojnë Serbinë) jep leje. Ne po flasim për një fqinjësi të mirë, që të funksionojmë së bashku, prandaj Serbia duhet të lëshojë pe dhe ta lejojë anëtarësimin e FBK-së në FIBA”, deklaroi për Express, Belegu. /Telegrafi/