Kelmendi dhe Gjakova do të marrin pjesë në Botërorin e Brazilit

Majlinda Kelmendi dhe Nora Gjakova do të marrin pjesë në kampionatin botëror të xhudos që do të mbahet nga 26 gushti deri më 31 gusht në Rio De Janeiro të Brazilit.

Kampionati do të mbahet në kompleksin e mirënjohur të Rios, “Maracana”, pjesë e të cilit është edhe stadiumi më i madh dhe më i famshëm në botë, Maracana. Majlinda Kelmendi do të jetë bartëse e grupit dhe llogaritet favorite për medalje ndërsa Nora Gjakova udhëton si e 27-ta në Ranglistën Botërore, njofton Zëri.

Në kampionatin botëror të Rios do të marrin pjesë 135 shtete. Në kategorinë e Majlindës deri më 52 kilogram, janë lajmëruar 43 pjesëmarrëse ndërsa në kategorinë e Norës deri më 57 kilogram janë lajmëruar 54 garuese.

Ndërkohë nesër pritet të mbahet kuvendi i ri zgjedhor në Federatën e Xhudos së Kosovës, ku pritet që kryetar të rizgjidhet, Agron Kuka. Ndërkohë kjo do të jetë hera e parë që Federata e Xhudos së Kosovës do të prezantoj Kosovën në një kampionat botëror si një shtet me të drejta të plota. /Telegrafi/