Mazrekaj kërkon kohë

Mesfushori prishtinas premton se do të shkëlqejë në kampionatin shqiptar të futbollit me fanellën e Partizanit të Tiranës, mirëpo i duhet edhe tri ndeshje për t’u kthyer në top formë.

Në Kosovë konsiderohej padyshim lojtari më i mirë i kampionatit. Jo më kot, kureshtja për të parë në fushë Mazrekajn ishte e madhe në kryeqytet.

Tifozët e shumë të Partizanit që kanë ndjekur ndeshjen, menjëherë kanë pyetur se cili është Mazrekaj, duke evidentuar menjëherë fanelën me numër “14” të veshur nga mesfushori i ardhur nga Prishtina.

Një paraqitje mjaft e mirë e mesfushorit, i cili pritet të drejtojë dhe lojën e të kuqve në sezonin e ri. Edhe trajneri Lika në fund të ndeshjes, ndonëse me rezerva nuk i ka fshehur komplimentet për Mentorin.

Megjithatë për të parë Mazrekajn e vërtetë, tifozët e Partizanit do të presin fundin e shtatorit, kur të jenë konsumuar 2-3 javët e para të kampionatit. Kjo, për shkak të mungesës së kondicionit të tij, njofton Sporti1.

“Jam disi më mbrapa me përgatitjet. Skuadra ka qenë në Greqi, ndërsa unë në Prishtinë dhe natyrisht që nuk mund të jem në 100% të formës sime. Jam disi më pas krahasuar me shokët e ekipit, megjithatë besoj se pas javës së tretë do të jem në formën time më të mirë”, tha Mazrekaj për Sporti1.

“Unë jam i bindur se kemi mundësi të ecim përpara, pasi Partizani ka një grup mjaft të mirë dhe që premton”, vazhdoi ai.

“Kemi shpërdoruar shumë, megjithatë kjo ishte thjesht një miqësore. Jam i bindur se në kampionat do të jetë ndryshe. Unë mendoj se grupi është gati. Tani shpresojmë të vijë dhe një sulmues, që është thënë se do të vijë së shpejti, dhe besoj se gjithçka do të jetë gati për fillimin e kampionatit”, shtoi ai.

Që në paraqitjen e tij të parë në Tiranë me Partizanin, Mazrekaj duket se ka fituar simpatinë e tifozëve të skuadrës së kuqe. Megjithatë, Mazrekaj nuk ka bërë shumë komente në lidhje me këtë çështje. Ai është mjaftuar vetëm me: “Unë përpiqem të jap gjithnjë maksimumin në fushë për të ndihmuar skuadrën”. /Telegrafi/