Bashkimi i fortë për kampionin

Sigkos Bashkimi ka fituar në derbin e kësaj jave në BKT Superligë ndaj Trepçës me rezultat 76:70. Përforcimet e huaja Dustin Mitchell dhe Philip Brooks ishin më të mirët për prizrenasit, derisa te mitrovicasit edhe një herë më i miri ishte Drilon Hajrizi.

Pas Pejës dhe Sigal Prishtinës edhe Sigkos Bashkimi e ka mposhtur kampionin dhe fituesin e Kupës në basketboll, Trepçën. Kjo ndeshje u zhvillua në Pejë, pasi që palestra “Minatori” është ende duke u rinovuar.

Në palestrën e nxehtë “Karagaçi” mbretëroi atmosferë impozante, ku ishin të pranishëm rreth 1000 shikues, të cilët erdhën për ta motivuar klubin e tyre të zemrës.

Sigkos Bashkimi e nisi shumë mirë ndeshjen duke e diktuar ritmin e lojës në dhjetë minutat e para, andaj edhe këtë çerek e përmbyllën në favor të tyre me shifrat 22:17. Në periodën e dytë u zhvillua një lojë më e baraspeshuar, andaj edhe kjo pjesë e lojës përfundoi baras 12:12, derisa skuadrat shkuan në pushim me rezultat 34:29 në të mirë të mysafirëve.

Në pjesën e dytë të takimit Trepça shfaqi lojë dukshëm më të mirë dhe arritën që të kthehen në lojë, duke e fituar këtë dhjetë minutësh me rezultat 25:17. Në dhjetë minutat e fundit kur pritej që mitrovicasit ta mbanin këtë ritëm nuk ndodhi kështu, pasi Sigkos Bashkimi u tregua një skuadër më e fokusuar dhe në fund ia doli të fitojë këtë ndeshje me gjashtë pikë dallim, 76:70.

Basketbollistët më të dalluar të Sigkos Bashkimit ishin Dustin Mitchell me 30 pikë dhe Philip Brooks me 17 sosh, derisa te Trepça u dallua Drilon Hajrizi me 25 pikë.

Rezultatet tjera të xhiros së gjashtë të BKT Superligës :

RTV 21 – Kosova (V) 82:66
Peja – Drita 102:56
Sigal Prishtina – Vëllaznimi 103:60
/Telegrafi/