Turneu i futbollit në rërë – “Hej” Beach Soccer Kosova 2012

Në pishinën e Gërmisë në Prishtinë të shtunën ka filluar turneu i futbollit në rërë, “Hej” Beach Soccer Kosova 2012. Në edicionin e parë të këtij turneu që tash e tutje pritet të jetë tradicional kanë marrë pjesë 16 ekipe të ftuara nga organizatori e që kryesisht përbëheshin nga jeta sportive, kulturore dhe shoqërore.

Turneu mbështetet nga Federata e Futbollit e Kosovës, Ministria e Kulturës, Rinisë dhe Sportit, Drejtorati për Sport në Komunën e Prishtinës dhe nga kompani vendore të biznesit.

Hapjen e turneut e kanë bërë kryetari i FFK-së, Fadil Vokrri dhe ministri i Rinisë, Kulturës dhe Sportit i Kosovës, Memli Krasniqi, ndërsa gjatë gjashtë orëve, mysafirë kanë qenë shumë figura të shquara, në mesin e të cilëve edhe futbollisti i mirënjohur shqiptar, Shefki Kuqi.

Në bazë të ndeshjeve mund të themi se shikuesit e shumtë kanë pasur rastin të shohin futboll mjaft të bukur, atraktiv, por edhe kanë dëgjuar muzikë të mirë me çka nuk e kanë ndier thuajse fare vapën verore

Në rrethin e parë janë zhvilluar tetë ndeshje ndërsa rezultatet ishin këto:

IPKO – Raiffeisen Bank, 5:4
RTK – Policia e Kosovës 1:10
Fakulteti i Shkencave Sportive – Babel 1:3
Infosporti – Lips Caffe 2:3
Bamboo – Konak 2:1
Aeroporti – RTV 21 2:5
Përfaqësuesja e Kosovës – Croatia Sigurimi 7:2

Të dielën në çerekfinale do të ballafaqohen IPKO – Policia e Kosovës, Babel – PTK, Lipss Caffe – Bamboo dhe RTV 21 – Përfaqësuesja e Kosovës.

Fituesit e këtyre ndeshjeve më pas do të kualifikohen në gjysmëfinale e pas atyre ndeshjeve më pas do ta mësojmë edhe çiftin final, që do të zhvillohet nga ora 17:20 e që do të transmetohet drejtpërdrejt në Radio Televizionin e Kosovës. /Telegrafi/