Bjeshkatarë nga Afrika e Jugut dhe Argjentina në ekspeditën e trekufirit

Anëtarë të Federatës Bjeshkatare Alpiniste e Kosovës dhe mysafirë nga dy kontinente të largëta, do të nisen nesër (të dielën) për një udhëtim shtatë ditor në Bjeshkët e Nemuna, në kuadër të një aktiviteti të organizuar së bashku me Federatën ndërkombëtare të bjeshkatarisë për herë të parë që nga anëtarësimi me të drejta të plota në këtë organizatë të pranuar nga Komiteti Olimpik Ndërkombëtar.

Ekspedita gjatë ecjes shtatë ditore do kalojë në trekufirin Kosovë, Mal i Zi, Shqipëri prej 1 deri 7 korrik. Gjatë ecjes do të kalohen Bjeshkët e Nemuna dhe do të vizitohen vende si Rugova, Plava e Gucia, Vermoshi, Thethi dhe Valbona që të gjitha perla të bjeshkëve.

Ky aktivitet gjithashtu shërben si pjesë e promovimit të këtyre bjeshkëve dhe mundësive turistike të tyre që ofrojnë vizitën n tri shtete brenda një udhëtimi. Pasi organizimi bëhet nga Kosova ky udhëtim promovon edhe Kosovën si destinacion i bjeshkatarisë.

Ftesa për këtë ecje është bërë përmes rrjetit të Federatës Ndërkombëtare të Bjeshkatarisë që ka siguruar pjesëmarrje nga tre kontinente dhe pesë shtete të ndryshme: SHBA-të, Italia, Argjentina, Afrika e Jugut dhe Mali i Zi.

“Ne konsiderojmë se kjo është një pjesëmarrje e gjerë dhe është shumë e mirë sidomos për herën e parë. Mendojmë se ky aktivitet do të ketë shumë efekte si për bjeshkatarinë ashtu edhe për Kosovën. Kjo ngjarje do të përmirësojë imazhin e Kosovës dhe rajonit; do të reklamojë bukuritë natyrore të Bjeshkëve të Nemuna dhe do të promovojë Kosovën si vendin më atraktiv për tu futur në këtë trekëndësh”, ka thënë Arben Lila, kryetar i Federatës së Bjeshkatarëve Alpinistë të Kosovës (FBAKU).

“Herëve të tjera mendojmë se do të kemi pjesëmarrje edhe më masive pasi mysafirët tanë do të japin rekomandime – shpresojmë shumë pozitive për ne. Federata është duke u përqendruar në organizimin e ngjarjeve që do të sjellin vizitorë në Kosovë. Mirëpo nuk do lëmë anash as përpjekjet që të kemi një ekip në majat më të larta të botës”, ka shtuar Lila.

Ekspedita ndërkombëtare do të fillojë nga 1 korriku dhe do të vazhdojë deri më 7 korrik. FBAK-u pret që të ketë rreth 150 pjesëmarrës në këtë aktivitet. /Telegrafi/