Basketboll, kampioni fitoi derbin

Përballja e shumëpritur ndërmjet Sigal Prishtinës dhe Trepçës zhgënjeu adhuruesit e basketbollit. Në derbi më së paku pati sport. Ata (tifozët) të cilët rëndom marrin “bajrakun” për organizimin e shfaqjeve të bukura, këtë herë prishën imazhin e asaj që mund të quhet e bukur, spektakël, lojë dhe së fundi sport.

Ende pa filluar takimi, Plisat e Prishtinës kërkuan “takim” jo sportiv me Torcidën e Mitrovicës ,e cila u vu në shënjestër të tentativave fizike të grupit nikoqir. Torcidat u dëbuan dhe kthyen përsëri në sallë. Ky nuk ishte vendimi i parë i çuditshëm i mbrëmjes.

Ndeshja filloi disi ndërsa mitrovicasit të pakënaqur me vendimet e gjyqtarëve vendosën për ta braktisur parketin dhe për t’i dhënë fund kësaj ndeshjeje. Gjyqtari kryesor Hajredin Zeka pas pak dha shenjë për përfundimin e takimit pasi që mysafirët nuk deshën ta vazhdojnë lojën.

Jashtë parketit filloi ‘loja’ për t’i bindur mitrovicasit ta ‘thyejnë’ vendimin e tyre. Nuk kaloi shumë dhe kjo u bë, sikur që edhe gjyqtari Zeka vendimin e tij e ktheu në kujtim të veprimit të mëhershëm që doli të ishte i ngutshëm dhe jo i peshuar mirë.

Në gjithë këtë katrahurë ngatërresash të rregullave dhe të tifozllëkut josportiv, u vendos që loja të vazhdojë dhe për fatin e mirë edhe të përfundojë.

Pak fjalë edhe për lojën në parket – Sigal Prishtina ishte dominuese gjatë gjithë kohës duke dëshmuar se duelin e fitoi me meritë (83-61). Me këtë fitore Sigal Prishtina është shumë afër qëllimit që garat e ‘play-offit’ t’i fillojë nga pozita e parë. /Telegrafi/