Nesër Superkupa e Kosovës

Nesër në stadiumin olimpik “Adem Jashari” në Mitrovicë me fillim nga ora 16:00 zhvillohet ndeshja e Superkupës në futboll ndërmjet kampionit Hysit dhe fituesit të kupës së Kosovës, Besa.

Skuadrat tashmë janë mobilizuar me synimin për ta filluar mbarë edicionin e ri të garave.
“Përgatitjet kanë rrjedhur me sukses dhe jemi optimistë se do ta fitojmë trofeun e Superkupës, për ta filluar mbarë këtë edicion”, ka thënë kryetrajneri i Hysit, Fadil Ademi.
Për Hysin në pikëpyetje është aktivizimi i dy qendërmbrojtësve, Jashanica dhe Haliti, të dy të lënduar.
Nga tabori pejan po ashtu thonë se janë përgatitur maksimalisht për këtë sfidë.
“Jemi të mobilizuar sepse këtu vendos një ndeshje, andaj takimit do t’i qasemi me seriozitetin më të lartë për të shënuar fitore”, ka thënë kryetrajneri i Besës, Valdet Shoshi. Besa në këtë përballje do të jetë komplete.

Gjyqtarët të cilët do ta drejtojnë Superkupën e Kosovës do të përcaktohen me short para fillimit të takimit. /Telegrafi/