​Kërkojnë më shumë të drejta, Iniciativa e Pavarur e të Verbërve hyjnë në grevë

Iniciativa e Pavarur e të Verbërve ka filluar grevën e urisë për shkak të, siç thonë përfaqësuesit e saj, mosreflektimit ndaj kërkesave të tyre nga institucionet shtetërore. Grevistët kanë kërkuar respektim të Ligjit për të Verbrit, punësim, si dhe që librezat e verbërisë të jepen nga Ministria e Punës dhe Mirëqenies Sociale.

Përfaqësuesi i grevistëve, Halil Kurmehaj ka bërë të ditur se para fillimit të grevës janë thirrur në takim nga zyra e kryeministrit, por që sipas tij nuk kanë marrë ndonjë zgjidhje konkrete të situatës.

“Na ka zënë pa përgatitur takimi i sotëm që e kishim me zyrën e kryeministrit, aty ishte edhe këshilltari i kryeministrit z. Lluka ku ata u zotuan që kanë me na mbështet megjithatë nuk dhanë ndonjë zgjidhje konkrete të situatës. Prandaj, ne sot po dalim në rrugë dhe siç po e shihni shumë prej të verbërve kanë dal me shoqëruesit e tyre, shumë prej tyre nuk kanë edhe shoqërues. Kështu një mesazh ndoshta për institucionet e Kosovës me ju thënë bravo ju qoftë që po dini me i qitë në rrugë kështu”, tha Kurmehaj.

“Kërkesat tona janë të shumta dhe të gjitha këto kërkesa janë të bazuara në ligj. Është çështja e punësimit që është çështja më kruciale ku shumica prej nesh kemi kryer edhe studimet themelore dhe të nivelit Master. Kërkesat tona janë punësim sipas ligjeve në fuqi, po ashtu ne po kërkojmë edhe një stabilitet sa i përket çështjes së edukimit dhe arsimimit duke krijuar kushtet adekuate për shkollim dhe arsimim. Jo vetëm për të shkuar në shkollë publike, përfshi edhe universitetet publike pa pasur edhe një kusht të vetëm për të studiuar”, tha ai.

Po ashtu, ai bëri të ditur se si Iniciativë kanë pasur takime të shumta me institucione të Kosovës ku kanë adresuar kërkesat e tyre, por që ai tha se Qeveria nuk i ka marrë parasysh.

Kjo Iniciativë e Pavarur e të Verbërve kërkon që librezat e verbërisë të jepen nga Ministria e Punës dhe Mirëqenies Sociale, e jo nga Shoqata e të Verbërve të Kosovës. Ku për këtë të fundit Kurmehaj ka thënë se nuk i kanë mbështetur asnjëherë.

“Jo ne nuk kemi përkrahjen e tyre, ne i kemi ftuar vazhdimisht dhe sot i ftojmë të na bashkëngjiten. Ne nuk kemi asnjë telashe me ta po ndoshta ata i kanë zgjidhur problemet e tyre dhe nuk mund të bëjnë një veprim të tillë. Më lejoni të përmend edhe një fakt tjetër për shkak se ne jemi duke sulmuar edhe çështjen e librezave të verbërisë ku aktualisht i lëshon Shoqata e të Verbërve të Kosovës ku i merr për një vit në vlerë prej 24 eurove dhe aty bëhen me mijëra euro dhe ata nuk kanë ndonjë interes që të kërkojnë zbatimin e ligjit”, tha ai.

Punësim për më shumë se 32 vite ka kërkuar Bajram Gashi nga ky komunitet, por i cili thotë se asnjëherë nuk ka mundur të punësohet.

E kërkesë e tij tashmë është që të paktën gjeneratat e reja të kenë mundësi për t’u punësuar.

“Kam përfunduar shkollimin e mesëm, kam qenë nga 86-ta po për fat të keq nuk më është dhënë mundësia me u punësua. Viti i 32-të që po pres, tash edhe me thënë me u punësua nuk më merr askush… Kërkesat janë punësimi i gjeneratës së re, gjeneratës që nga 99 e tutje që kanë diplomuar nëpër Universitetet e Kosovës”, tha Gashi.

Fillimisht është thënë që greva e urisë do të zgjasë 24 orë, por që sot kur ka filluar greva përfaqësuesit e Iniciativës shprehen se nuk do të ndalen së kërkuari përmbushjen e kërkesave të tyre. /KP/