Ylli i kohëve të vështira

Prej pavarësimit të sportit kosovar e tutje, qyteti i Pejës mburret për dy gjenerata të klubit të basketbollit që është simbol i këtij qyteti.

Derisa gjenerata e parë ishte e bazuar në lojtarë pejanë, e dyta ishte thuajse tërësisht e bazuar në lojtarë të huaj. Pjesë e këtyre dy gjeneratave ishte basketbollisti ndër më të mirët që ka pasur Peja, Dardan Kasapolli.

Gjenerata e parë, ajo e viteve nëntëdhjetë, dominoi basketbollin kosovar duke fituar tre tituj rresht. Arsye që nuk kanë të bëjnë shumë me sportin bënë që kjo gjeneratë të mos dominojë për kohë më të gjatë.

Ndërkohë gjenerata tjetër, ajo e bazuar te të huajt, fitoi titullin e kampionit të Kosovës, kur basketbolli kosovar ishte në kulmin e tij, në edicionin 2003/04.

Në gjeneratën e parë Kasapolli së bashku me disa të tjerë ishte lojtar kyç i Pejës. Ndërkohë në gjeneratën e dytë, që u grumbullua në ekipin e njohur me emrin Dukagjini, Dardan Kasapolli qëndroi më shumë në stol se në parket.

Por kontributi i tij në vitet nëntëdhjetë dhe në vitet e para të pasluftës, për basketbollin pejan dhe atë kosovar në përgjithësi vlerësohet i lartë. Në një publikim ai ishte vlerësuar basketbollist i dekadës për qytetin e Pejës. Për Kasapollin, tani 42-vjeçar, është shkruar për angazhim, efikasitet të lartë dhe për sjellje shembullore. Shkruan po ashtu se nuk ka munguar në asnjë ndeshje të Pejës, prej themelimit të klubit e deri në vitin 2006.

Kasapolli, si shumica e bashkëlojtarëve, topin në kosh nisi ta gjuante gjatë përballjeve mes shoqërisë. Vëllezërit Grapci dhe vëllezërit Gorani ishin bahkëlojtarët dhe kundërshtarët e tij të parë, shkruan sot Koha Ditore.

“Me ata e kam filluar edhe karrierën. Së pari kemi nisur të luajmë si juniorë në ekipin që njihej me emrin Buduqnosti, deri në fillim të viteve ‘90”, ka thënë Dardan Kasapolli në një intervistë për gazetën. Ai ka luajtur në pozitën e fundorit dhe ishte ndër më efikasët në skuadër.

Pas pavarësimit të sportit kosovar, Kasapolli luajti fillimisht për Besën e Pejës, ndërsa me themelimin e klubit Peja iu bashkua kësaj skuadre.