Volkswagen prezanton modelin Caddy

Kompania prestigjioze gjermane, Volkswagen, ka prezantuar modelin e ri Caddy për vitin 2015, pak ditë para se të fillojë panairi i automjeteve që do të mbahet në Gjenevë.

Marka e prodhimit të veturave ka bërë të ditur se kjo do të jetë gjenerata e katërt, me të cilën kanë për qëllim të vazhdojnë shitjen e suksesshme (gjenerata e mëparshme deri më tani është shitur deri në 1.5 milion njësi).

Dizajni nuk ka ndryshuar shumë në krahasim me modelin e mëparshëm, ndoshta kompania Volkswagen përsëri nuk deshi që të rrezikojë. Gjermanët përsëri po luajnë në mënyrë të sigurt, duke pasur parasysh pamjen sikurse të modeleve më të reja të kësaj marke.

Megjithatë, ndryshimet vizuale kryesisht janë eksterieri i modifikuar si mbrojtësit, dritat, maska e përparme, dera e pasme, si dhe enterieri i modifikuar me një panel të përparme të re, dorezën e marshit, timonin e ri, transmeton Koha.net. Gjithashtu ky model do të posedojë edhe pajisjet të tilla si Discover Media, sistemet infotainment si Composition Media dhe Compostion Color, si dhe Adaptive Cruise Control (ACC).

Sa i përket motorit ky model do të jetë me benzinë dhe me naftë. Motorët benzinë do të jenë trecilindërsh, 1.0 l, TSI me kapacitet prej 102 KF; katërcilindërsh, 1.2 l, TSI me kapacitet prej 84 KF; si dhe 1.4 l, TSI me kapacitet prej 125 KF. Ndërsa motorët me naftë do të jenë TDI me kapacitet prej 75 deri 150 KF.

Në komunikatën e VW-së thuhet se modeli Caddy van BlueMotion është versioni më ekonomik, me një shpenzim të karburantit prej më pak se katër litra, transmeton Koha.net. Po ashtu në këtë paketë do të jetë edhe versioni Caddy 1.4 TGI, i cili për lëvizje do të shfrytëzojë gazin natyror dhe atë me shpenzim prej 4.1 kilogramë për 100 kilometra.

Porositë për këtë model, Caddy 2015, do të fillojnë nga muaji i ardhshëm, ndërsa dërgesat pritet të fillojnë nga muaji qershor i këtij viti. Çmimi i këtij modeli në Gjermani pritet të fillojë nga 14.785 euro. /Koha/Telegrafi/