Vdekja e të vetëshpallurës shenjtore, policia heton edhe vrasjen

Policia e Tiranës është duke hetuar edhe në pistën e vrasjes së të vetëshpallurës shenjtorja Eleonorë.

Burime nga policia e Tiranës bëjnë të ditur se përveç pistës së vetëvrasjes, e cila është dhe pista kryesore, po hetohet edhe për vrasje të mundshme, ndërsa nuk jepen më shumë detaje se ku bazohet kjo pistë hetimi. Ngjarja e rëndë ndodhi mbrëmjen e djeshme rreth orës 19:15 në zonën e Selitës në kryeqytet, raporton Bw.

Trupi i pajetë është gjetur nga vajza e saj në krevatin e dhomës së gjumit. Kanë qenë forcat e komisariatit numër 1 dhe më pas ato të komisariatit numër 2 të mbërritura në vendin e ngjarjes, të cilat kanë gjetur në banesën e të ndjerës një letër për Zotin dhe besimtarët e sektit të saj, të cilën Eleonora e kishte shkruar para se ajo t’i jepte fund jetës.

Në letrën shkruhej: “Më mirë të vras veten se të lë tokën e shenjtë”. Toka ku Eleonora kishte ngritur kultin fetar, prej vitesh ishte shndërruar në mollë sherri mes saj dhe familjes Vorpsi. /Telegrafi/