Vazhdojnë fitoret e përfaqësueseve U18 në Austri

Në ditën e tretë të turneut djelmoshat tanë u kualifikuan në çerekfinale si lider i grupit pas fitores së tretë të cilën e arritën me rezultat zyrtar pas tërheqjes nga garat të ekipit kundërshtar, ndërsa përfaqësuesja e vajzave pësoi humbje me rezultat të ngushtë.

Djelmoshat tanë sot (e premte) i pret një ditë e ngarkuar ku me fillim nga ora 08:00 takohen me skuadrën Italiane, Arcella, e cila është kualifikuar si e dyta nga grupi C. Nëse arrijnë fitore atëherë kualifikohen për në gjysmëfinale e cila do të zhvillohet nga ora 16:45. Finalja zhvillohet të shtunën nga ora 13:30.

Ndërkaq vashat tona në takimin e tretë të grupit E, pësuan humbje me rezultat të ngushtë 33:32 nga skuadra italiane dhe kështu përfunduan të dytat në grup.

Ndeshja prej fillimit e deri në fund ishte e barabartë dhe me rivalitet të theksuar, ndërsa mungesa e përvojës në gara ndërkombëtare e bëri të veten dhe për këtë arsye basketbollisteve kosovare në momentet e fundit iu humbi përqendrimi dhe në fund u mposhtën. Megjithatë paraqitja e vashave tona ishte mbresëlënëse.

Ndeshja ardhshme do të luhet të premten në ora 08:00 kundër ekipit Riga nga Letonia, e cila vjen si e para nga grupi A dhe në rast fitoreje kualifikohemi për çerekfinale, e cila po ashtu do të zhvillohet të premten pasdite, derisa gjysmëfinalja është në planprogram të njëjtën ditë, shkruan në raportin e FBK-së. /Telegrafi/