Universiteti i Prizrenit, paradigmë e fushatave zgjedhore të partive politike

Pas një heshtje të gjatë institucionale, në qytetin e Prizrenit u bë e domosdoshme themelimi i një zëri qytetarë për të kërkuar të drejtën tonë legjitime dhe institucionale të fushën e arsimit, atë të themelimit të Universitetit Publik të Prizrenit.

Kjo heshtje ka të bëj kryesisht për shkak se në qytetin e Prizrenit nuk është punuar asgjë sa i përket themelimit të Universitetit të Prizrenit, sepse kjo çështje iu është lënë “politikave ditore” dhe rastësisë politike.

Qeveria e Kosovës miratoi të drejtën e qytetarëve të Prizrenit për hapjen e një universiteti. Në Prizren kishte hare dhe gëzim të madh atë ditë. Mobilizimi ynë intelektual, i ”Shoqatës për hapjen e Universitetit Publik të Prizrenit”, me të gjitha grupet e interesit, ekonomitë e mëdha dhe të mesme, me shoqërinë civile me të gjitha njësitë teologjike, atë të strukturave fetare; si atë Islame në Prizren, Kishës Katolike, Lidhjes së Dervishëve, Kishës së Engjëjve të protestantëve, më në fund po realizohej pas një aktiviteti të lodhshëm dhe të mundimshëm.

Kur mbrëmja arriti dhe filloi nata të tregoj ngjyrën e saj futë të zezë, nëpër Prizren shiheshin billbordat e kryeministrit të Kosovës Hashim Thaqit, si dhe kryetarit të Komunës së Prizrenit, Raman Mujës. Ky fakt dhe realitet menjëherë filloi të zbehej sepse edhe në të kaluarën nëpër fushata të ndryshme të partive të ndryshme politike ishte manifestuar e njëjta gjë. Edhe ish ministri i arsimit, zotëri Veliu pati themeluar Universitetit Publik të Prizrenit mu në prag të fushatës parazgjedhore dhe kjo patë mbetur vetëm në letra. E njëjta gjë po ndodh e dhe tani. Universiteti ynë po vihet në qendër si paradigmë e fushatës parazgjedhore dhe ketë më mirë dinë ta përdorin partitë politike.

Në këtë billborda mund të vëresh figurën e kryeministrit të Kosovës, Hashim Thaqit dhe kryetarit të Komunës, Ramadan Mujës. Aty mund të lexosh fjalinë falënderuese të Ramadan Mujës bërë kryeministrit dhe kjo si formë e hapur politike të konoton fillimin e një fushatë parazgjedhore.

Universiteti Publik i Prizrenit, nuk duhet të jetë qendër e asnjë fushate politike partiake dhe në asnjë mënyrë të jetë objekt politik. Universiteti duhet të themelohet pa pasur të drejtë askush që lojëra të tilla të bën në kurriz të arsimit dhe arsimimit në përgjithësi. Kjo duhet të jetë një praktikë për të gjitha partitë politike të cilat nuk duhet të bëjnë objekte të tilla dhe të rëndësishme për qëllim të fushatave të tyre parazgjedhore.

Universiteti i Prizrenit duhet të themelohet, kush do ta prenë shiritin e kuq nuk është me rëndësi dhe as që qon peshë tek qytetarët e Prizrenit, por ajo që mund të na dhembë është fakti se arsimin në përgjithësi dhe në veçanti, Universitetin të mos e bëjnë objekt politik parazgjedhor.

Universiteti duhet të qëndroj autonom para politikave të partive politike sepse fundja përmes universiteti krijohen gjenerata të tëra studiuesish, profesorëve, mjekësh etj.

(Autori është kryetar i “Shoqatës për hapjen e Universitetit Publik të Prizrenit”)