Toka përjetoi dy ditët e saja më të nxehta në muajin korrik – 2024 mund të jetë viti më i ngrohtë ndonjëherë i regjistruar

Korriku i vitit 2024 doli të jetë korriku i dytë më i nxehtë që ka parë toka, vetëm pak më i freskët se korriku i vitit 2023, sipas një raporti të publikuar të enjten nga monitoruesi i klimës i Bashkimit Evropian, Copernicus.

Në korrik të vitit 2024, temperatura mesatare globale ishte 16,91 gradë Celsius, 0,04 gradë më e ulët se temperatura mesatare në korrik të vitit 2023, aktualisht muaji më i nxehtë i regjistruar. Deri në muajin qershor, temperaturat mesatare mujore kishin thyer rekorde çdo muaj që nga maji i vitit 2023.

“Seria e muajve që thyen rekorde ka përfunduar, por vetëm për pak”, tha zëvendësdrejtoresha e Shërbimit për Ndryshimet Klimatike, Copernicus, Samantha Burgess.

“Efektet shkatërruese të ndryshimeve klimatike kanë filluar shumë përpara vitit 2023 dhe do të vazhdojnë deri sa emetimet globale të gazrave serrë të arrijnë në zero”, shtoi ajo.

Për periudhën nga gushti i vitit 2023 deri në korrik të vitit 2024, temperatura mesatare globale ishte 1.64 gradë Celsius mbi mesataren para-industriale, tregojnë të dhënat e Copernicus.

Toka përjetoi dy ditët më të nxehta ndonjëherë në muajin korrik – me temperatura mesatare ditore globale që arritën 17.16 dhe 17.15 gradë më 22 dhe 23 korrik, shkruan france24.

Temperatura mesatare evropiane në muajin korrik tejkaloi vlerën mesatare për muajin nga viti 1991 deri në vitin 2020 me 1,49 gradë Celsius, duke e bërë atë korrikun e dytë më të ngrohtë që nga matjet në Evropë.

Sipas raportit, temperaturat ishin kryesisht mbi mesataren në Evropën Jugore dhe Lindore, por afër ose nën mesataren në Evropën veriperëndimore.

Shërbimi klimatik i Bashkimit Evropian Copernicus publikon rregullisht të dhëna për temperaturën e sipërfaqes së Tokës, mbulesën e akullit të detit dhe reshjet. Gjetjet bazohen në analizat e krijuara nga kompjuteri që përfshijnë miliarda matje nga satelitët, anijet, aeroplanët dhe stacionet e motit në mbarë botën. /Telegrafi/