Të varfrit mbushin arkat e bankave

Qytetarët e Kosovës nuk kanë ku t’i investojnë kursimet e tyre. Paratë që ndajnë nga paga ose nga fitimet tjera sa për të mos i lënë nën jastëk, po i deponojnë në bankat komerciale në vend. Kjo edhe duket alternativa e vetme për investim të sigurt në Kosovë. Ndërkohë bankat kanë ulur skajshmërisht normën e interesit për depozita.

Norma mesatare e interesit për depozita gjatë kësaj vere ka qenë nga 0.6 deri në 0.9 për qind, përderisa në periudhën e njëjtë të vitit të kaluar ishin rreth 3.5 për qind. Por, pavarësisht kësaj qytetarët kanë rritur për 6 për qind depozitat në bankat e vendit në muajin gusht, krahasuar me periudhën e njëjtë të vitit të kaluar.

Kjo i bie se në Kosovë, që zë vendin më të varfër në Evropë, qytetarët kanë arritur që t’i afatizojnë në bankat e vendit plot 2 miliardë e 513 milionë euro.

Kontribuues kryesorë në rritjen e depozitave vazhdojnë të jenë depozitat e ekonomive familjare të cilat përfaqësojnë 73.7 për qind të gjithsej depozitave, dhe shënuan rritje vjetore prej 7.2 për qind. /Tribuna/Telegrafi/