Të hyrat buxhetore shënojnë rritje prej 8.7%

Ministri i Financave, Avdullah Hoti sot në mbledhjen e Qeverisë prezantoi Raportin e të hyrave dhe shpenzimeve buxhetore për periudhën janar-korrik 2015, i cili u miratua nga Qeveria.

Në Raportin e të hyrave dhe shpenzimeve buxhetore për periudhën janar – korrik 2015  rezulton se gjatë kësaj periudhe të hyrat buxhetore janë rritur me 8.7 për qind krahasuar me periudhën e njëjtë të vitit 2014 të shtyra kryesisht nga të hyrat tatimore.

“Vlera e arkëtuar e të hyrave nga taksat kufitare përgjatë kësaj përudhe ka regjistruar 498.2 milionë euro apo 7.4 për qind më shumë krahasuar me periudhën e njëjtë të vitit paraprak. Përveç rritjes së sasisë së importit, kësaj rritjeje i ka kontribuuar edhe rritja e normës së akcizës në disa produkte dhe rritja e importit të tyre. Këtu mund të veçojmë rritjen prej mbi 6 për qind të importit të cigareve gjatë periudhës janar-korrik, si dhe rritjen prej 16 për qind të importit të naftës përgjatë kësaj periudhe. Megjithatë, rritja e konsiderueshme e importit në përgjithësi ka kontribuar në rritjen e përgjithshme të të hyrave të arkëtuara në kufi”, ka thënë ai.

Të hyrat e arkëtuara në vend për këtë periudhë regjistruan rritje prej 9.2 për qind krahasuar me periudhën e njëjtë të vitit 2014 dhe arritën vlerën prej 198.4 milionë euro.

“Të hyrat vetanake të komunave kanë regjistruar rënie prej 14.3 për qind krahasuar me periudhën e njëjtë të vitit 2014. Këtij trendi i ka kontribuar paralajmërimi për faljen e borxheve gjë që mund të ketë shtyrë tatimpaguesit e tatimit në pronë të presin implementimin e Ligjit mbi faljen e borxheve. Të hyrat tjera jo-tatimore në përgjithësi kanë shfaqur realizim të kënaqshëm në raport me parashikimin për këtë periudhë”, u shpreh ministri Hoti.

Sipas raportit, shpenzimet buxhetore kanë regjistruar një rritje prej 3.7 për qind si rezultat i efektit të plotë të rritjes së pagave për shërbyesit civil dhe të pensioneve për kontribut-dhënës, pensioneve bazë dhe transfereve tjera të financuara nga shteti në muajin prill të vitit 2014.

Në ngadalësimin e rritjes së shpenzimeve ka ndikuar ekzekutimi i ulët i shpenzimeve kapitale dhe kursimet në kategorinë e shpenzimeve në mallra dhe shërbime.

Shpenzimet në paga dhe mëditje arritën vlerën prej 302.7 milionë euro apo 9.34 për qind më të larta se sa shpenzimet në këtë kategori për periudhën e njëjte të 2014, ndërsa shpenzimet në mallra dhe shërbime gjatë periudhës janar-korrik arritën vlerën prej 101.8 milionë euro vlerë kjo që korrespondon me një rënie prej 8.6 për qind krahasuar me periudhën e njëjtë të vitit, si dhe shpenzimet në subvencione dhe transfere arritën vlerën prej 229.6 milionë euro apo 16.9 për qind më të larta krahasuar me vitin 2014. /Telegrafi/