Të brendshmet e zeza: Joshja e pavdekshme

Historia ka treguar se të brendshmet seksi klasike nuk do të dalin kurrë nga moda. Madje ato mund të konsiderohen një armë e fuqishme e femrave.

Sido që të jetë moda, sado që të kalojë koha, gjithnjë rikthehemi te ato “lingerie” që i mbajmë veç të tjerave për ndonjë rast special, por pse jo edhe për përditë. Po flasim për ato të brendshmet seksi, me dantella të zeza që ngrenë gjoksin lart e zhartierët që mbajnë çorapet e gjata të najlonit. Ato nuk do dalin kurrë nga moda.

Beyonce i riktheu fuqishëm në videoklipin “Haunted”, kolonë zanore e “Fifty Shades of Grey” me kompletin e saj super seksi të “Agent Provocateur” (s’kishte si të ishte ndryshe në fakt).

Por ajo që njihet si periudha e artë e të brendshmeve seksi, janë vitet ’20 me ikonën e sensualitetit Marlene Dietrich. Edhe pse njihej kryesisht për veshjet e saj të stilit mashkullor, Marlene u bë e paharrueshme në filmin e saj “Blue Angel” ku shfaqte këmbët e saj të mrekullueshme me zhartier dhe çorape të gjata të zeza. “Maskiliteti i saj tërheq femrat dhe seksualiteti i saj, meshkujt”, shkruante atëherë kritiku Kenneth Tynan.

Me vonë, ky stil rikthehet sërish nga mbretëresha e pop-it Madonna. Në videon e këngës “Justify my love” në vitin 1993, ajo shfaqet joshëse me një komplet të brendshmesh në ngjyrë të zezë me zhartier, në një skenë erotike.

Ndër yjet e tjera të muzikës që janë zhveshur për performanca sensuale ka qenë edhe Rihanna në videoklipin e këngës “Te amo” në një skenë të nxehtë me modelen e famshme Laetitia Casta.

Në ditët tona, ikona e të brendshmeve seksi, mbetet Dita Von Teese, shkruan Anabel. Ajo e quan zhveshjen një art që jo çdokush e ka talentin për ta zhvilluar.

E në fakt nuk janë të pakta yjet që janë zhveshur në ekran, (kujtojmë Britney Spears në këngën “Gimme more”).

Edhe nëse linjat tuaja nuk janë perfekte si të Dita Von Teese, një palë të brendshme të tilla do ta kompesojnë këtë. Por fundja, të brendshmet e bukura nuk shërbejnë vetëm për të kënaqur sytë e partnerit. Provoni nesër në mëngjes, të vishni nën rrobat tuaja të zakonshme, një komplet seksi që përqafon format trupore. Vetëbesim është ai që ndieni? /Telegrafi/