Superliga, javë e mysafirëve

Xhiroja e 24 e Raiffeisen Superligës së Kosovës në futboll kaloi në shenjë të dominimit të skuadrave mysafire. Asnjë skuadër vendase nuk ia doli të shënojë fitore.

Prishtina ishte e vetmja në këtë xhiro që arkëtoi tre pikë. Kryeqytetasit mposhtën Lirinë në Prizren me rezultat 3-1. Me këtë fitore Prishtina riktheu pozitën e liderit në tabelën e klasifikimit. Liria kaloi e para në epërsi, porse mysafirët ia dolën që në pjesën e dytë të shënojnë tre gola duke e fituar bindshëm derbin e javës.

Serinë e lojërave dhe rezultateve të mira e vazhdoi Drenica, e cila nga Peja importoi një pikë të vlefshme për vazhdimin e garave. Në këtë takim skuadrat nuk ishin të ngarkuara me epilogun, gjë që futbollistëve iu mundësua të luajnë lirshëm për të demonstruar lojë të pëlqyer.

Trepça dhe Vëllaznimi ndanë pikët pa gola. Mbase fati i kësaj përballje ende nuk është përmbyllur, ngase mysafirët nga Gjakova kanë paralajmëruar ankesë me arsyetimin se një futbollist i nikoqirëve u aktivizua në lojë dhe nuk ishte në protokollin zyrtar. Komisioni i garave në ditët në vijim do të marrë vendim përfundimtar për këtë takim.

KEK-u dhe Drita mbyllën takimin pa gola. Ky rezultat asnjërës nuk i kryen shumë punë. KEK-u me këtë pikë nuk shkëputet nga pjesa e poshtme, sikurse edhe Drita me një pikë nga ky duel nuk bëri hap drejt pozitës së parë në tabelë.

Lepenci dhe Trepça ’89 luajtën pa gola në ballafaqimin që u vlerësua i fortë dhe mbi të gjitha korrekt, pavarësisht peshës së madhe që pati takimi.

Gjilani mezi barazoi me Hysin në terren të vet në një ndeshje që kishte shumë tensione dhe vërejtje të mysafirëve në ndarjen e drejtësisë.

Besa dhe Vëllaznimi mbetën të vetmet në stinorin pranveror që nuk kanë pësuar humbje.

Në këtë xhiro u shënuan tetw gola që vlerësohet efikasitet shumë i varfër.

Rezultatet:

Liria – Prishtina 1-3
Besa – Drenica 1-1
Kek-u-Drita 0-0
Lepenci – Trepça’89 0-0
Trepça-Vëllaznimi 0:0
Gjilani – Hysi 1-1

Pas kësaj jave Prishtina kthen kryesimin me 45 pikë, para Vëllaznimit me 44 pikë dhe Trepçës ’89 që ka tubuar 42 pikë. Gjilani dhe Kek-u përmbyllin tabelën e klasifikimit me nga 21 pikë.

Në javën e ardhshme takohen:
Drenica – Liria
Prishtina – Trepça
Vëllaznimi – Lepenci
Trepça’89 -KEK-u
Drita-Gjilani
Hysi-Besa

/Telegrafi/