Skandal me kuponë fiskalë, kompanitë shpërndajnë aso që tashmë janë të ndaluar (Video)

Një numër i kompanive kanë rikthyer në qarkullim kuponët që tashmë janë të ndaluar, duke ua dhënë qytetarëve në raste kur ata i kanë kërkuar.

Kohëve të fundit, një pjesë e qytetarëve janë befasuar kur në disa kompani kanë marrë kuponë fiskalë që kanë datë të vitit 2000.

Dyshohet se këto raste kanë ndodhur në disa kompani të sektorëve të ndryshëm, por që Administrata Tatimore e Kosovës pjesën dërrmuese të tyre e ka cilësuar si gabim teknik.

Zyrtarë të saj i kanë thënë KTV-së se janë disa kompani për të cilat ende janë duke u bërë hetime. Nahit Sharku e ka arsyetuar këtë veprim me mungesë informatash nga kompanitë rreth përdorimit të pajisjeve fiskale.

Mirëpo, me këto deklarata nuk është pajtuar Shoqata e Operatorëve të Pajisjeve Fiskale.

Në vend, vazhdojnë të jenë një numër i madh i kompanive që nuk japin kuponë fiskalë.

Në mesin e tyre, janë edhe kompani që shesin derivate të naftës dhe që me një marrëveshje të arritur me Ministrinë e Financave po presin licencimin e kompanive të reja të arkave fiskale për t’u pajisur me to.