Shoqata e Bankave: Norma e kredive 9.3% afër mesatares së rajonit

Shoqata e Bankave të Kosovës ka reaguar sot ndaj Aksionit “Fajde me letra”, të Vetëvendosjes, ndaj sistemit bankar të Kosovës, i cili sipas kësaj lëvizjeje “po i rrjep qytetarët përmes shërbimeve të shtrenjta dhe të pavolitshme.

Shoqata e Bankave pasi rikujton se “Liria e shprehjes është shumë e rëndësishme për zhvillimin e debatit dhe demokracisë në një vend dhe ne e respektojmë këtë parim, megjithatë”, këshillon kritikuesit se duke thënë se ankesat të shprehen në mënyrë institucionale dhe në adresat e duhura.
Sipas kësaj shoqate, Bankat komerciale në Kosovë i kanë departamentet e tyre për ankesa dhe po ashtu ekziston departamenti për mbrojtjen e konsumatorit edhe në Bankën Qendrore të Kosovës, por edhe në MTI, ku mund të adresohet çfarëdo shqetësimi.

“Sa i përket pankartave të vendosura dje në bankat komerciale të Kosovës, neve ende nuk kemi ndonjë konfirmim zyrtar se a janë të vendosura nga aktivistet e Vetëvendosjes, siç është pohuar në media. Megjithatë, cilësdo organizatë që i takojnë këta aktivistë, asnjëherë nuk e kanë marrë mundin që të na drejtohen për ndonjë takim apo diskutim ku ata mund t’i adresojnë shqetësimet e tyre dhe ku mund të marrin informata më të sakta pasi që nga prononcimet e këtyre aktivistëve në media shihet se nuk i kanë informatat e sakta, sepse citojnë se mesatarja e normës së interesit është 14 për qind, përderisa në realitet mesatarja është 9.3 për qind e që është afër mesatares së rajonit”.

Sipas reagimit krahasimi i kamatave me bankat në vendet e BE-së është i pa drejtë, pasi siç theksojnë “Kosova ende nuk ka përmbushur kushtet për të bërë biznes si në vendet e BE-së”. “Normat e interesit kanë shënuar përmirësim të vazhdueshëm në Kosovë duke pësuar rënie për 30 për qind në 5 vitet e fundit dhe duke shënuar norma njëshifrore për herë të parë në vitin 2014. Nëse vazhdohet me këtë trend, ne do të kemi ofertë edhe më të mirë dhe kreditim edhe më të madh nga bankat komerciale të Kosovës në vitet në vijim. Ne mbesim të hapur për të gjitha organizatat e interesuara për të marrë më shumë informata në këtë drejtim dhe për të diskutuar trendet aktuale dhe sfidat me të cilat ballafaqohet sektori financiar në Kosovë”, thuhet në reagim. /Telegrafi/