Shënohet Dita Ndërkombëtare e Infermierisë

Në Qendrën Klinike Universitare të Kosovës, u shënua sot Dita Ndërkombëtare e Infermierisë. Infermierët kërkojnë kushte më të mira të punës, ndërkohë që drejtues të institucioneve shëndetësore premtojnë angazhim në këtë drejtim.

Gashire Hyseni dhe Besa Krasniqi janë vetëm dy nga infermierët e shumta të Qendrës Klinike Universitare, të cilat duan kushte më të mira të punës, ndonëse, sipas tyre, përkushtimi për pacientë nuk mungon.

“Në këtë mangësi të madhe ka shumë kërkesa, por, e para, do të ishte kushtet materiale lidhur me pagesën që bëhet për infermieret. Mirëpo, kjo nuk ka ndikuar asnjëherë në punën dhe vullnetin e infermierit, e ne bëjmë apel në përmirësimin e kushteve edhe të pacientëve edhe të infermierëve duke filluar që nga shtretërit e çdo gjë tjetër që ka një spital”, ka thënë Besa Hyseni.

“Unë do kërkoja të kemi një sallë këtu më afër dhe jo aq larg sa i dërgojmë ne pacientët”, thotë Besa Krasniqi.

Zërin e tyre e ka dëgjuar sot edhe drejtori i QKUK-së, Ali Sadria. Ai u shpreh i gatshëm që të ndihmojë në sektorët ku është më se e nevojshme.

“Është një ditë ku pres që të elaburohen të gjitha sfidat dhe problemet që ka kjo kategori dhe, pres, po ashtu, që të marrë edhe refleksionet, që, në cilat pista duhet të intervenojmë, në mënyrë që e nesërmja të jetë më e mirë”, ka thënë Sadria.

Edhe zyrtarë të Ministrisë së Shëndetësisë kanë folur mbi rolin e infermierëve në shëndetësinë kosovare.

“Infermieria, si pjesë e sistemit shëndetësor, mbetet bërthama e organizmit për parandalimin e shumë sëmundjeve kronike, ofrimin e përkujdesjes dhe ngritjen e vetëdijesimit për gjitha kategoritë e popullatës sonë, me qëllim që shëndeti të jetë epiqendër e zhvillimeve të reja”, ka thënë zëdhënësi i Ministrisë së Shëndetësisë, Faik Hoti.

Ndërkaq Lirije Beqiri, drejtoreshë e Infermierisë së QKUK-së, tha se ata po bëjnë një punë të palodhshme dhe me ambicie për të zhvilluar edhe më shumë infermierinë kosovare. /RTK/