SHBA beson në mbrojtjen e saj nga raketat e Koresë Veriore

Pentagoni njoftoi sot se ka besim në kapacitetet e Shteteve të Bashkuara të Amerikës që të mbrohet nga raketat e Koresë së Veriut, pasi Pjong-jangu lansoi një raketë të re ndërkontinentale, e cila besohet të jetë në gjendje për të arritur në territorin e SHBA-ve.

Zëdhënësi i Ministrisë së Mbrojtjes, Jeff Davis tha se një raketë e tillë mund të arrijë deri në Alaskë dhe se ajo ishte lansuar nga një platformë e lëvizshme.

“Ne besojmë në kapacitetin tonë për t’u mbrojtur kundër kërcënimeve të kufizuara, të cilat ekzistojnë aktualisht”, tha Davis.

Ai shtoi se analistët e Pentagonit nuk e kanë parë më herët tipin e raketës, e cila dje u testua nga Pjong-jangu.

Davis shprehu besimin e tij se Koreja e Veriut është ende larg qëllimit të saj për zhvillimin e raketave ndërkontinentale që mund të bartin koka bërthamore.

Ndryshe, raketa, e cila u testua me rastin e Ditës së Pavarësisë së SHBA-ve, është quajtur nga udhëheqësi i Koresë së Veriut Kim Jong-un si “një tortë për bastardët amerikanë”, transmeton KosovaPress.