Sëmundjet e zemrës dhe “stresi reduktiv”

Antioksiduesit gjerësisht konsiderohen si mbrojtje e rëndësishme nga sëmundjet e zemrës, por hulumtuesit nga Universiteti i Utah kanë gjetur nivele të larta të një antioksiduesi (glutation i reduktuar), i cili mund t’i kontribuojë sëmundjes. Njohuritë indikojnë një klasë të re barnash që duhet të zhvillohen për ta trajtuar sëmundjen ose madje ta parandalojnë atë.

Burimi: University of Utah

Proteina alfa B-Crystallin, e njohur si mbikëqyrëse molekulare, normalisht ndihmon proteinat tjera të mblidhen brenda qelizës. Në gjendje normale qeliza prodhon sasi korrekte të glutationit të reduktuar, që është i shëndetshëm për organizmin. Fatkeqësisht, kur gjeni i cili prodhon alfa B-Crystallin pëson mutacion, proteina mblidhet në mënyrë të çrregullt, që dallon në organe të ndryshme duke përfshirë edhe zemrën. Kur të ndodh kjo, glutationi i reduktuar është i prodhuar në nivele ekcesive sa që dëmton zemrën. Kondicioni që pason quhet “stresi reduktiv”.

Në një studim me minj laboratorikë me insuficiencë të zemrës të shkaktuar nga alfa B-Crystallina mutante, është gjetur aktivitet i rritur i proceseve biokimike që çon drejt nivelit të rritur të glutationit të reduktuar te kafshët.

Niveli i glutationit, njërit nga antioksiduesit më të fuqishëm të organizmit, është i rregulluar nga enzima G6PD. Studimi i bërë në minjtë me nivele të larta të G6PD dhe tek ata me nivel të ulët, rezultoi me nivel normal të glutationit të reduktuar dhe nuk u zhvillua insuficiencë e zemrës. Por, duke e zvogëluar nivelin e glutationit të reduktuar, në mënyrë të theksuar ndryshoi edhe mbijetesa e këtyre minjve, në parim u parandalua pamjaftueshmëria e zemrës.

Sëmundjet e zemrës, Alzheimer, Parkinson dhe sëmundjet tjera vdekjeprurëse janë të shoqëruara me stres oksidativ, ku radikalet e lira molekulare janë të prodhuara nga reaksionet oksiduese. Radikalet e lira qarkullojnë në trup duke nxitur reaksione kimike që dëmtojnë proteinat dhe shkaktojnë agregimin e tyre. Shumë njerëz marrin antioksidues për të parandaluar sëmundjet e zemrës dhe sëmundjet tjera proteinë-agreguese, mirëpo pak fakte evidentojnë veprimin e tyre.

Deri më tani “stresi reduktiv” nuk është shikuar në kontekst të sëmundjes. Duke zvogëluar nivelin e glutationit të reduktuar pa alterimin e gjenit mutant që kodon alfa B-Crystallinën, gjatë këtij hulumtimi tregohet se “stresi reduktiv” mund të adresohet nëpërmjet barnave të reja që shënjestrojnë rrugën gjenetike e cila e shkakton problemin. /Telegrafi/