Rritet numri i super të pasurve

Pasuria e individëve që zotërojnë më shumë se 30 milionë dollarë në asete, ka arritur një nivel rekord gjatë vitit 2014.

Por studimi, që është kryer në nivel global, nxjerr në pah se mungesa e diversifikimit do të thotë se kjo pasuri nuk është e mbrojtur nga goditjet në sistemin financiar. Sipas raportit të publikuar nga UBS, 12 mijë e 40 nga këta super të pasur u formuan gjatë vitit kalendarik që u mbyll në qershor të 2014. Kjo do të thotë një rritje prej 6 për qind, krahasuar me vitin e kaluar, duke e çuar numrin e milionerëve në një rekord prej 211 mijë e 275 persona.

Në vitin 2013, Prodhimi i Brendshëm Bruto në Shtetet e Bashkuara rezultoi në rreth 17 trilionë dollarë. Kjo do të thotë se super të pasurit kanë një pasuri rreth 2 herë më të lartë se ekonomia më e madhe në botë. Raporti nxjerr gjithashtu në pah se proporcioni është jashtëzakonisht i lartë, krahasuar me pasurinë e tyre në “cash”.

Sipas raportit, shumica e milionerëve e kanë ngritur vetë pasurinë e tyre, përfshirë ngritjen e bizneseve private. Parashikohet gjithashtu, që numri i super të pasurve të rritet në 250 mijë gjatë 5 viteve të ardhshme, ose me 18 për qind krahasuar me të dhënat e këtij viti.

Amerika e Veriut dhe Europa vazhdojnë të dominojnë, me Shtetet e Bashkuara që qëndrojnë në vendin e parë me një numër prej 69 mijë e 560 individë. Por Azia do të jetë rajoni që do të njohë rritjen më të shpejtë, sa i përket super të pasurve. /Telegrafi/