Rritet numri i qytetareve për mamografi falas pranë Spitalit Amerikan në Prishtinë

Spitali Amerikan në Prishtinë mundëson mamografi falas edhe përgjatë muajit nëntor. Rastet e dyshimta do të kenë mundësi të bëjnë konsultë falas me kirurgun onkolog. Gjatë muajit dhjetor, mamografia do të ofrohet me 50% ulje për të gjitha gratë e interesuara.

Ndryshe nga çdo parashikim i mundshëm, në dyert e Spitalit Amerikan në Prishtinë kanë trokitur me qindra gra për të kryer këtë ekzaminim të ofruar falas.

“ Numri i grave që janë regjistruar në Spitalin Amerikan për të kryer mamografinë, tejkalon çdo parashikim. Kjo tregon se ky institucion ka realizuar misionin e tij, që të sensibilizojë dhe të nxisë grupmoshat e grave mbi dyzet vjeç të vetëdijesohen për shëndetin e tyre, të kryejnë një kontrollim fillestar dhe të mund të diagnostikojnë dhe parandalojnë në kohë pasojat e sëmundjes së rëndë siç është kanceri i gjirit”, ka thënë radiologu i Spitalit Amerikan, Mr.Sc.Dr.Bujar Gjikolli.

Duke u solidarizuar me nevojën e qytetareve kosovare për të kryer këtë ekzaminim, Spitali Amerikan mundëson edhe për muajin nëntor mamografi falas për gratë që e prenotojnë këtë kontrollim dhe njëkohësisht deklaron se në datën 10 tetor mbyll terminet për prenotime për mamografitë falas, të cilat do të kryhen gjatë muajit tetor dhe nëntor.

Për më tepër, Spitali Amerikan ka vendosur që të ofrojë konsultë falas te kirurgu onkolog për të gjitha gratë që kanë kryer mamografinë në spitalin tonë dhe kanë indikacione për një konsultë të tillë.

Për shkak të interesimit të madh, në vazhdimësi të këtij vendimi në Spitalin Amerikan në Prishtinë, gjatë muajit dhjetor mamografia do të ofrohet me 50% ulje për të gjitha gratë e interesuara.

Deri me 8 tetor 2012, në Spitalin Amerikan janë lajmëruar 425 gra të interesuara për të kryer mamografinë ndërsa 70 prej tyre kanë kryer këtë ekzaminim gjatë javës së parë të fushatës.

Mijëra gra vuajnë nga kanceri i gjirit. Afërsisht një në nëntë gra preken nga ky kancer. Diagnostikimi në kohë parandalon kancerin e gjirit! Kryerja e mamografisë ul ndjeshëm vdekjen nga kanceri i gjirit. /Telegrafi/