Real Madridi nderon Ronaldon për rekordet e reja

Këtë të premte Real Madridi ka organizuar një ceremoni të veçantë, ku i ka dorëzuar një çmim Cristiano Ronaldos, për thyerjen e rekordit të golave për klubin spanjoll.

Me dy golat e shënuar në mesjavë në Malmo, Ronaldo ka mbërritur në kuotën e 323 golave për Realin, po aq sa Raul, por Real Madridi dhe e përditshmja spanjolle “Marca” e nxjerrin Ronaldon me 324 gola.

Paqartësia vjen nga një gol i shënuar ndaj Sociedadit në vitin 2010, kur një gjuajtje e Ronaldos u prek pak nga mbrojtësi Pepe, i cili tha se goli ishte i Ronaldos, por në protokollet zyrtare u shënua dhe ka mbetur si i Pepes.

Duke folur në tubimin e bërë për nder të tij, Ronaldo u shpreh: “Është një nder për mua të marr këtë çmim, nuk e imagjinoja kurrë që të kaloja emra si Raul e Di Stefano”.

“Falënderoj gjithë trajnerët e mi te Reali, presidentin, miqtë e mi, familjen dhe menaxherin tim Jorge Mendes”.

“Falënderoj edhe mediat, sepse e di që kohët e fundit jam treguar pak bastard me ta, por kështu jam gatuar”, ka thënë Ronaldo. /Telegrafi/