Raiffeisen e kalon stres testin e BQE-së

Grupi Raiffeisen Zentralbank Österreich AG (RZB) – që paraqet edhe institucionin qendror të grupit bankar Raiffeisen në Austri, duke e përfshirë edhe Grupin Raiffeisen Bank International (RBI), kompanitë e sektorëve të specializuar dhe UNIQA – e kaloi me sukses stres testin e Bankës Qëndore Europiane (BQE). RZB i tejkaloi dukshëm koeficientët e mjaftueshmërisë së kapitalit, si në skenarin bazik ashtu edhe në skenarin e pafavorshëm të stres testit. Sa i përket skenarit të bazuar në koeficientët bazë, RZB arrin të ketë koeficientin e mjaftueshmërisë së kapitalit të klasit të parë (CET 1 ratio), duke përfshirë edhe korrigjimet nga rishikimi i kualitetit të aseteve (Asset Quality Review), prej 9.48 për qind (koeficienti i domosdoshëm: 8.0 për qind). Sa i përket skenarit të pafavorshëm, koeficienti i mjaftueshmërisë së kapitalit të klasit të parë të RZB ), duke përfshirë edhe korrigjimet nga rishikimi i kualitetit të aseteve është 7.77 për qind (koeficienti i domosdoshëm: 5.5 për qind).

Rishikimi i kualitetit të aseteve nga BQE, e cila i ka paraprirë stres testit, ka ndikuar në përshtatjen e koeficientit të mjaftueshmërisë së kapitalit të klasit të parë në vlerë prej 0.65 pikë përqindjeje. Këto përshtatje janë bërë kryesisht si rezultat i faktit që BQE ka pasur një qasje më ndryshe ndaj provizioneve për mbulimin e kredive të këqija në kuadër të portfolios së kredive. Për më tepër, koeficienti i kualitetit të aseteve nuk llogarit provizionet të cilat janë krijuar në vitin aktual financiar.

“Këto rezultate konfirmojnë qëndrueshmërinë e modelit të biznesit të RZB, posaqërisht kur janë zbatuar skenare mjaft sfiduese të stress testeve në vendin tone dhe Evropën Qëndore dhe Lindore, në krahasim me vendet tjera të rajonit të Evropës”, tha Walter Rothensteiner, drejtor i përgjithshëm i RZB.
“Ne jemi të kënaqur se rezultatet nga rishikimi i kualitetit të aseteve i konfirmojnë vlerësimet e brendshme në bilancin tonë të gjendjes”.

Në kuadër të publikimit të rezultateve, BQE ka publikuar edhe koeficientët hipotetik për të dhënat financiare deri më 31 dhjetor 2013 duke u bazuar tërësisht në rregulloret e Basel III. Këto rregullore do të hyjnë në fuqi në vitin 2023. Informata më të hollësishme mbi rezultatet e stress testit të RZB mund t’i gjeni në ECB’s Website. /Telegrafi/