Po rritet publiku i “Skena UP”

Në Festivalin “Skena UP”, sot, do të jetë konkurrenca kombëtare e filmit, që fillon nga ora 18:00 në Teatrin Oda, ku do të shfaqen nëntë filma studentor. Shumica e regjisorëve janë të fakultetit të Prishtinës, një nga Maqedonia dhe një nga Shqipëria.

Organizatorët e këtij festivali thonë se janë të kënaqur me rrjedhën e festivalit dhe se publiku i festivalit po rritet. Në këtë festival, pjesëmarrës janë regjisor nga Kosova, Gjermania, Greqia dhe vende tjera.

Vesa Qena, organizatore e festivalit “Skena UP”, thotë se dje, në ditën e tretë të festivalit, janë shfaqur filma të konkurrencës ndërkombëtare, ku ka pasur një program special, e që ka qenë Dita Franceze. Ndërsa, në programin e teatrit, dje janë dhënë dy shfaqje, njëra ka qenë nga Anglia dhe një shfaqje nga Irani.

Qena thotë se janë shumë të kënaqur, pasi që programi i Skena UP është i ngjeshur dhe ka shumë lëvizje. Sipas saj trendi i filmave tashmë është kah filmat eksperimental dhe se as filmat kosovarë nuk janë prapa atyre të huajve.

Ndërsa, Hana Qena thekson se vizitorë të festivalit zakonisht janë studentët, pasi që ky festival është tejet i rëndësishëm për ta.

Regjisorja e filmit “Portrait”, Katarina Kalentzi nga Greqia, tha se qëllimi i saj ishte shfaqja e ndjenjave individuale, të njerëzve në moshën e pleqërisë, e që sipas saj, atëherë kuptohet në të vërtetë se çfarë ka kaluar dikush në jetë.

Ndryshe, edicioni i 11-të i filmit Skena UP, ka filluar me 5 dhjetor dhe do të zgjasë deri me 11 dhjetor. /KP/Telegrafi/