“Peshqit e mëdhenj” nuk janë të paprekshëm

Avokati Tomë Gashi thotë se me kryeprokurorin Aleksandër Lumezi punët po shkojnë shumë më mirë dhe shpreson se përpara organeve të drejtësisë do të dalin edhe "peshqit e mëdhenj".

Kosova është shndërruar në një filialë të qeveritarëve të korruptuar nga oligarkët korruptues, të cilët nuk bëjnë asgjë të drejtë dhe në interes të qytetarëve, por vetëm për interesa korruptive dhe kriminale të karteleve dhe rrjeteve të krimit në Kosovë, shkruan Kosova Sot.

Kosova është në fakt një vend ku zyrtarët, pushtetarët dhe oligarkët e tyre kriminalë, të organizuar në rrjete të krimit, deri sot nuk kanë dhënë llogari të ligjshme për veprat e tyre të jashtëligjshme, korruptive e kriminale, për shkak të të cilëve qytetarët mbetën pa liberalizim të vizave dhe MSA-ja ende po vonon.

Ekonomia e demokracia po shkatërrohen e nëpërkëmben çdo ditë, qytetarët po ikin nga vendi, ndërkaq për të gjitha këto të këqija që ky pushtet po ua sjell qytetarëve, askush nuk jep llogari para ligjit.

Avokati Tomë Gashi thotë se me kryeprokurorin, Aleksandër Lumezi, punët po shkojnë shumë më mirë.

“Nga emërimi i z. Lumezi si kryeprokuror i shtetit, punët duket se janë marrë shumë më seriozisht nga Prokuroria e shtetit. Nuk ka më të paprekshëm, nuk ka më vetëm peshqit e vegjël të përballen me akuza dhe me hetime, e ata të mëdhenjtë të rrinë nën hije thuajse kanë imunitet të përjetshëm”, shprehet avokati Tomë Gashi. /Kosova sot/