Perimet dhe peshku, çelës për uljen e rrezikut nga kanceri kolorektal

Dëshironi ta shmangni shkakun e dytë kryesor të vdekjes nga kanceri, kancerin kolorektal? Filloni të hani më shumë perime. Më mirë akoma, plotësoni një dietë të shëndetshme vegjetariane me peshk.

Një studim i ri i hulumtoi rezultatet dietike dhe shëndetësore të 77.000 amerikanëve dhe konstatoi se ata që i kishin qëndruar besnik një diete vegjetariane kishin 22 për qind gjasa më të ulëta të zhvillimit të kancerit kolorektal. Ata që kishin ngrënë perime dhe peshk e kishin ulur rrezikun e tyre nga kanceri kolorektal për 43 për qind.

"Vegjetarianët tanë jo vetëm që kishin ngrënë më pak mish sesa jovegjetarianët, por edhe më pak ëmbëlsira, ushqime të lehta, drithëra të rafinuara dhe pije kalorike," tha për HealthDay, Michael Orlich, profesor asistent i mjekësisë preventive në Universitetin Loma Linda në Kaliforni.

Të gjithë pjesëmarrësit në studim ishin Adventistë të Ditës së Shtatë, një grup protestantësh me të cilin është e lidhur Loma Linda. Feja promovon një mënyrë shumë të shëndetshme jetese dhe dietike, dhe ajo i ka prodhuar vazhdimisht disa prej amerikanëve më jetëgjatë.

"Ekziston një histori që nga vitet 1950 të studimeve mbi Adventistë të Ditës së Shtatë, dhe shumica e studimeve kanë konstatuar se ata janë popullsi e shëndetshme, jetëgjatë, kështu që është interesante të shqyrtohet se pse ndodh kjo", tha Orlich për Wall Street Journal.

Sa për mekanizmin ushqyes në funksion, studiuesit nuk mund të thonë asgjë definitive, transmeton Koh.net. Studimet dietike, si ky, mund t’i sjellin në pah korrelacionet, por nuk mund ta izolojnë shkakun dhe pasojën.

"Ky është problemi në studimet dietike të kancerit", tha dr. Alfred Neugut, profesor i epidemiologjisë në Qendrën Mjekësore të Universitetit Columbia. "Ne nuk e dimë saktësisht se çfarë lidhjeje është kjo".

Megjithatë, rezultatet u japin besueshmëri studimeve të mëparshme të cilat kanë sugjeruar për rezultatet pozitive shëndetësore të konsumit të lartë të frutave dhe perimeve, duke e vënë theksin në rrezikun nga konsumimi i mishit të kuq.

Studimi i ri u botua së fundi në ”Journal of the American Medical Association”.